Presidenti i SHBA-së, Donald Trump, ka shprehur pakënaqësinë e tij pas sulmeve vdekjeprurëse ajrore të Rusisë në Kiev, të cilat lanë të paktën 12 të vdekur dhe 90 të plagosur. “Jo e nevojshme dhe me kohë shumë të keqe. Vladimir, NDAL!” shkroi Trump në rrjetin e tij Truth Social, në një nga rastet e rralla të kritikës publike ndaj presidentit rus Vladimir Putin.
Trump theksoi se është “duke ushtruar shumë presion mbi të dyja palët” për t’i dhënë fund luftës në Ukrainë dhe shtoi se po pret një javë “për të parë nëse do kemi marrëveshje” – por paralajmëroi se “gjëra do të ndodhin” nëse bombardimet nuk ndalen.
Sulmet ndodhën në një moment kur po rritet presioni mbi Ukrainën dhe presidentin Volodymyr Zelensky që të pranojë humbjen e territoreve si pjesë e një marrëveshjeje paqeje. Trump kishte premtuar gjatë fushatës së tij se do të sillte paqe “shumë shpejt”.
Në një dalje me kryeministrin norvegjez Jonas Gahr Støre në Shtëpinë e Bardhë, Trump theksoi se nuk ka “asnjë aleancë me askënd”, përveç “aleancës për të shpëtuar jetë”.
I dërguari i posaçëm i Trump-it, Steve Witkoff, pritet të udhëtojë në Moskë të premten për të zhvilluar bisedime me Putinin.
Ndërkohë, Zelensky u shpreh nga Afrika e Jugut se SHBA mund të veprojë më me forcë për të detyruar Rusinë të ndalojë sulmet dhe të pranojë një armëpushim. “Nëse Rusia thotë se është gati të ndalojë zjarrin, atëherë duhet t’i japë fund sulmeve masive. Është Ukraina që po goditet, jo të tjerët,” tha Zelensky, duke shtuar se vetë gatishmëria për të negociuar është një “kompromis i madh”.
Pas sulmeve, Zelensky ndërpreu vizitën në Afrikë dhe u kthye në atdhe.
Nga ana tjetër, ministri i Jashtëm rus Sergei Lavrov deklaroi për CBS se “ne godasim vetëm objektiva ushtarake ose civile të përdorura nga ushtria”, pa ofruar prova për këto pretendime. Ai shtoi se marrëveshja e propozuar nga SHBA ka nevojë për disa “rregullime”.
Marrëdhënia Trump–Zelensky ka qenë në tension që prej deklaratave të Trump se Ukraina duhet të jetë e gatshme të japë territore. Zëvendëspresidenti amerikan JD Vance e përshkroi planin e SHBA-së si një “ngrirje të vijave territoriale aty ku janë sot”, duke nënkuptuar që të dyja palët do të humbasin territore.
Kur u pyet për njohjen e Krimesë si territor rus, Trump u shmang, duke deklaruar se thjesht dëshiron që lufta të përfundojë.
Sekretari i Shtetit, Marco Rubio, tha nga Oval Office: “U kemi treguar vijën e finishit. Tani kemi nevojë që të dy të thonë ‘po’. Ajo që ndodhi mbrëmë duhet t’i kujtojë botës pse kjo luftë duhet të marrë fund.”
Gjatë vizitës në Afrikën e Jugut, marrëdhëniet midis Kievit dhe Pretorias u përmirësuan dukshëm. Presidenti Cyril Ramaphosa tha se kishte folur si me Putinin ashtu edhe me Trumpin dhe e konsideron rolin e Afrikës së Jugut si neutral – ndaj të gatshëm për të ndihmuar në arritjen e paqes. Marrëdhëniet me SHBA-në janë tensionuar së fundmi, pasi Uashingtoni dëboi ambasadorin e Afrikës së Jugut dhe ndërpreu fondet e ndihmës.
