Administrata e Donald Trump ka nisur një ofensivë të ashpër ndaj Universitetit të Harvardit, duke kërcënuar me ndërprerjen e të gjitha granteve federale dhe akuzuar institucionin për “menaxhim katastrofik” dhe refuzim të transparencës. Vendimi është bërë publik përmes një letre të Sekretares së Arsimit, Linda McMahon, drejtuar presidentit të Harvardit, Alan M. Garber.

“Harvard nuk do të marrë më asnjë grant nga qeveria federale. Universiteti ka dështuar në përmbushjen e detyrimeve të tij ligjore dhe etike,” shkruan McMahon në deklaratën zyrtare, e cila është postuar edhe në internet.

Ky veprim vjen pas një përplasjeje të zgjatur mes administratës Trump dhe universiteteve elitare, të cilat janë akuzuar nga republikanët për tolerim të antisemitizmit në kampus dhe nxitje të protestave pro-palestineze. Harvardi, në veçanti, ka refuzuar të pranojë ndërhyrjen e qeverisë në politikat e tij të pranimeve, punësimit dhe aktivitetit politik studentor, duke e bërë atë një nga objektivat kryesorë të administratës Trump.

Në mesin e prillit, Shtëpia e Bardhë vendosi të ngrijë 2.2 miliardë dollarë fonde federale për Harvardin, ndërsa janë nën shqyrtim edhe 9 miliardë të tjera. Lëvizja shihet si një përpjekje për ta detyruar universitetin të ulet në tryezën e negociatave dhe të pranojë një linjë më konservatore në drejtimin akademik dhe administrativ.

Universiteti më i vjetër dhe më i pasur në SHBA, me asete që në vitin 2024 kapën vlerën e 53.2 miliardë dollarëve, po përballet me një trysni të jashtëzakonshme financiare dhe politike, teksa zërat kundër “kulturës së zgjimit” dhe lirisë së shprehjes në kampuse po dominojnë diskursin republikan.

“Ky është fundi i financimit të ri për Harvardin,” paralajmëron McMahon, ndërsa komuniteti akademik shpreh shqetësim për një sulm të paprecedentë ndaj autonomisë universitare dhe lirisë akademike në SHBA.