Një ngjarje tronditëse është zbuluar në Zelandën e Re, ku një 27-vjeçare është arrestuar pasi dyshohet se mbante të fshehur vajzën e saj 2-vjeçare brenda një valixheje, në ndarjen e bagazheve të një autobusi. Sipas autoriteteve, e dyshuara besohet se ka ardhur rishtazi nga Australia.

Ngjarja ndodhi të dielën, rreth orës 12:50 (ora lokale), në një stacion autobusi në Kaiwaka, rreth 100 km në veri të Auckland. Shoferi i autobusit kishte ndaluar për një pushim dhe u alarmua kur vuri re që një nga valixhet po lëvizte. Kur e hapi, zbuloi brenda një vajzë të vogël, vetëm me pampers.

“Vajza ishte shumë e nxehur, por përndryshe dukej pa lëndime fizike”, deklaroi hetuesi Simon Harrison. Dyshohet se fëmija kishte qëndruar për rreth një orë brenda valixhes. Ajo ndodhet aktualisht në spital për ekzaminime mjekësore të hollësishme.

Policia ka ngritur akuza për keqtrajtim dhe neglizhencë ndaj fëmijës ndaj 27-vjeçares, e cila ndodhet në paraburgim dhe pritet të dalë para gjykatës të hënën. Detektivi Harrison tha se falë reagimit të shpejtë të shoferit u shmang një tragjedi e mundshme.