Një grua transgjinore në Britani, e identifikuar si Ciara Watkin, 21 vjeçe, është shpallur fajtore për sulm seksual, pasi nuk i kishte treguar një 21-vjeçari gjendjen e saj gjinore përpara se të kryente akte seksuale me të. Ngjarja ka ndodhur në qershor 2022, ndërsa vendimi u dha në Gjykatën e Kurorës në Teesside. Prokuroria theksoi se mungesa e transparencës mbi identitetin e saj transgjinor e bëri të pamundur dhënien e pëlqimit të informuar nga viktima. Të dy ishin njohur në Snapchat, ku pas disa takimeve, Watkin i tha djalit se ishte me cikël menstrual, duke e penguar atë ta prekte poshtë belit ndërsa ajo i kryente akte seksuale.

Pak ditë më vonë, ata u takuan sërish në shtëpinë e viktimës, ku ndodhi një tjetër kontakt seksual. Dyshimet për identitetin e saj trans u ngritën edhe nga nëna dhe miqtë e viktimës. Vetëm më pas, përmes një mesazhi, Watkin i tregoi djalit se ishte transgjinore dhe kishte ende organet mashkullore, gjë që e la viktimën të tronditur. Në polici, ai deklaroi se nuk do të kishte hyrë kurrë në marrëdhënie seksuale sikur ta dinte të vërtetën. Prokuroria e konsideroi këtë si një mashtrim të qëllimshëm për të siguruar marrëdhënie seksuale.

Juria e shpalli Watkin fajtore për dy akuza për sulm seksual dhe një për sulm me penetrim, ndërsa gjykatësi deklaroi se dënimi me burg është “shumë i mundshëm”. Ajo është aktualisht e liruar me kusht, por do të dënohet më 10 tetor, ku autoritetet e burgjeve do të duhet të marrin parasysh “çështje të menaxhimit shumë të vështira” për shkak të gjendjes së saj gjinore. Prokuroria deklaroi se ky vendim i jep viktimës një ndjenjë drejtësie, pasi rasti ka pasur një ndikim të madh në shëndetin e tij mendor.