Dirk Swain, vetëm 20 vjeç, kishte shpëtuar për mrekulli pasi ishte qëlluar në kokë në kampusin e universitetit – por pak muaj më vonë, më 28 dhjetor 1991, humbi jetën në mënyrë tragjike në një ngjarje që duhej të ishte festë, jo fatkeqësi. Ai ishte një nga nëntë të rinjtë që u shtypën për vdekje në një turmë të pakontrolluar në City College të Nju Jorkut, gjatë një eventi bamirësie të organizuar nga producenti i ri atëherë, Sean “Diddy” Combs dhe reperi Heavy D.

Salla kishte kapacitet ligjor për rreth 2,700 vetë, por u dyndën mbi 5,000 pas shitjes së mëtejshme të biletave dhe thirrjeve nga radio të njohura për pjesëmarrje masive. “Ishte një katastrofë e paralajmëruar,” tregon Jason Swain, vëllai i Dirkit, në një intervistë për Daily Mail. Ai rrëfen momentin tragjik kur turma thyen dyert dhe shtypi për vdekje vëllain e tij – një i ri që sapo kishte filluar të jetonte sërish pas një përvoje të afërt me vdekjen.

Ngjarja la 29 të plagosur dhe tronditi qytetin, por sipas familjes Swain, përgjegjësia u shmang nga organizatorët. Diddy nuk u akuzua kurrë penalisht dhe deklaroi në vitin 1998 se “City College është diçka që e përjetoj çdo ditë të jetës sime”, por asnjëherë nuk kërkoi ndjesë. Familja Swain mori vetëm 40 mijë dollarë dëmshpërblim nga një shumë totale që besohet se ishte 600 mijë dollarë për 8 nga 9 paditë për vdekje të padrejtë.

Sot, ndërsa Diddy përballet me akuza të rënda për trafik seksual dhe dhunë në një çështje tjetër penale, Jason Swain thotë se “drejtësia më në fund po e arrin”. Ai vazhdon të nderojë kujtimin e vëllait përmes fondacionit “Dirk Swain Foundation” dhe dokumentarit “No Way Out”, ndërsa ka në zhvillim një libër dhe pjesën e dytë të dokumentarit për të mbajtur gjallë kujtimin e viktimave dhe për të kërkuar përgjegjësi që, sipas tij, mungoi atëherë dhe për shumë vite.