Shirat e rrëmbyeshëm kanë shkaktuar një rrëshqitje të rëndë dheu në provincën e Papuas Perëndimore të Indonezisë, duke goditur një minierë të vogël ari të përdorur nga banorët lokalë në rajonin malor Arfak.
Ngjarja tragjike ka shkaktuar vdekjen e gjashtë punëtorëve dhe plagosjen e katër të tjerëve, ndërsa 14 persona rezultojnë ende të zhdukur. Kërkimet për të mbijetuar janë pezulluar përkohësisht për shkak të kushteve të këqija të motit dhe terrenit të rrëshqitshëm.
“Rrugët dhe shtigjet janë dëmtuar rëndë. Na u deshën 12 orë për të mbërritur në vendngjarje”, – deklaroi për Reuters Yefri Sabaruddin, drejtuesi i ekipit të shpëtimit me 40 persona, përfshirë forca policore dhe ushtarake.
Ekipet e shpëtimit kanë nxjerrë deri tani pesë trupa, ndërsa autoritetet kanë paralajmëruar se numri i viktimave mund të rritet. Kërkimet pritet të rifillojnë të martën, nëse kushtet atmosferike përmirësohen.
Minierat e paligjshme janë të zakonshme në Indonezi, shpesh të vendosura në zona të thella malore ku mungojnë masat e sigurisë dhe monitorimi shtetëror. Aksidente të ngjashme janë regjistruar edhe më parë:
- Në shtator 2024, 15 persona humbën jetën nga një rrëshqitje dheu në një minierë ari në Sumatrën Perëndimore.
- Në korrik 2024, një tjetër shembje në ishullin Sulawesi mori jetën e të paktën 23 minatorëve.
Autoritetet u bëjnë thirrje banorëve të shmangin aktivitetet në miniera të pasigurta, ndërsa forcat e emergjencës mbeten në gatishmëri për të shpëtuar çdo jetë të mundshme.
