Një vajzë 20-vjeçare nga Gaza, e identifikuar si Marah Abu Zuhri, ka ndërruar jetë në një spital në Itali, vetëm 48 orë pasi mbërriti për trajtim urgjent. Marah ishte në gjendje kritike nga uria, me trup të dobësuar skajshëm dhe humbje të theksuar muskulature, sipas Spitalit Universitar të Pizës.
Ajo u transportua me avion gjatë natës të mërkurën, në kuadër të një skeme humanitare të qeverisë italiane për evakuimin e pacientëve nga Gaza. Pavarësisht përpjekjeve mjekësore, Marah pësoi arrestit kardiak dhe ndërroi jetë ditën e premte.
Alarm për urinë ekstreme në Gaza – mbi 250 viktima nga kequshqyerja
Rasti i Marah ka hedhur dritë mbi një krizë gjithnjë e më të rëndë në Rripin e Gazës. OKB ka paralajmëruar për përhapje të kequshqyerjes ekstreme, ndërsa raportet e fundit nga ekspertë të pavarur theksojnë se skenari më i keq i urisë masive tashmë po ndodh.
Sipas ministrisë së shëndetësisë së drejtuar nga Hamas, 11 persona të tjerë kanë vdekur nga uria këtë të shtunë, duke çuar numrin total të vdekjeve të lidhura me kequshqyerjen në mbi 250.
Nga fillimi i luftës, më shumë se 180 pacientë palestinezë – fëmijë dhe të rritur me sëmundje të rënda, plagë apo gjymtime – janë sjellë në Itali për trajtim. Vetëm këtë javë, 31 pacientë dhe shoqëruesit e tyre mbërritën në qytetet e Romës, Milanos dhe Pizës, njoftoi Ministria e Jashtme Italiane.
Britania premton evakuim të shpejtë, ndërsa Izraeli përgatit zhvendosje të reja në Gaza City
Ndërkohë, ligjvënës britanikë kanë kërkuar nga qeveria e tyre që të evakuojë pa vonesë fëmijët dhe të plagosurit nga Gaza në Mbretërinë e Bashkuar, siç ishte premtuar nga Kryeministri Keir Starmer. Ministria e Brendshme britanike tha se po planifikon evakuimin e disa qindra fëmijëve, por procesi do të nisë vetëm pas testimeve biometrike të detyrueshme.
Në anën tjetër, Izraeli ka njoftuar se do të pajisë qytetarët e Gaza City me çadra dhe pajisje, përpara zhvendosjes së tyre drejt zonave të konsideruara si “të sigurta”. Kjo lëvizje vjen pas vendimit për të okupuar Gaza City, të ndjekur nga bombardime intensive dhe operacione shkatërrimi, veçanërisht në lagjen e madhe të Zeitoun.
Një zëdhënës i komunës i tha BBC-së se situata në Zeitoun është katastrofike, me shpërngulje masive dhe destruksion të vazhdueshëm nga sulmet ajrore dhe artileria izraelite.
Bilanci i tmerrshëm i luftës
Sipas Ministrisë së Shëndetësisë në Gaza, të paktën 36 persona janë vrarë nga sulmet izraelite vetëm këtë të shtunë. Në total, më shumë se 60,000 njerëz kanë humbur jetën që nga nisja e luftës, sipas të dhënave të publikuara nga autoritetet lokale të drejtuara nga Hamas.
Izraeli vazhdon të mohojë ekzistencën e urisë dhe kequshqyerjes në Gaza, duke akuzuar OKB-në për mosshpërndarje të ndihmave dhe duke deklaruar se objektiv i tyre janë vetëm terroristët, jo civilët.
