Një ngjarje tragjike ka tronditur opinionin publik në Britani, pasi Emiljano Kasaj, një emigrant shqiptar 34-vjeçar në qëndrim të paligjshëm, vrau dy persona dhe plagosi një të tretë gjatë një sulmi të qëllimshëm me makinë në shtator 2023. Viktimat ishin Leo Moran, 44 vjeç, dhe Joel Carriedo, një punonjës i NHS dhe baba i dy fëmijëve, i cili po kthehej në shtëpi pas një turni nate. Pas përplasjes me viktimat, Kasaj u përpoq të arratisej, por u arrestua në një kopsht afër, ku më vonë në qeli tha: “Po të mos më çahej goma, do të kisha vrarë më shumë.”
Gjatë seancës së dënimit në Gjykatën e Warwickut, u bë e ditur se Kasaj kishte hyrë ilegalisht në Britani në vitin 2022 dhe ishte nën hetim nga Home Office për shkelje imigracioni, por kishte munguar në të gjitha takimet dhe askush nuk kishte vepruar për ta ndaluar. Ekspertë të shëndetit mendor dëshmuan se ai vuante nga psikozë paranoide e lidhur me skizofreni, e përkeqësuar nga përdorimi i drogës. Ai kishte iluzione se ishte “mbret” dhe po shantazhohej nga liderë politikë shqiptarë. Gjykata e dënoi me burgim të përjetshëm, me një urdhër të veçantë shëndetësor që parashikon mbajtjen e tij fillimisht në spital psikiatrik. Familjet e viktimave akuzuan ashpër Home Office për dështim të plotë në parandalimin e tragjedisë, duke theksuar se ky sulm mund të ishte shmangur nëse institucionet do kishin vepruar me përgjegjësi.
