Ashtu si çdo vit, në Dongo, në brigjet e Liqenit të Komos në Itali, dhjetëra neofashistë janë mbledhur për të përkujtuar Benito Musolinin, diktatorin fashist që u arrestua dhe më pas u ekzekutua në këto zona në prill të vitit 1945.
Manifestimi, i cili përfshin përshëndetje romake, simbole fashiste dhe parulla në nderim të Duçes, zhvillohet në heshtje të plotë nga autoritetet shtetërore italiane. Pavarësisht reagimeve të herëpashershme nga shoqëria civile dhe organizatat antifashiste, qeveria italiane nuk ka marrë masa për të ndaluar apo dënuar këtë ngjarje që përçmon historinë e dhimbshme të vendit dhe viktimat e fashizmit.
Në videon e shpërndarë gjerësisht në rrjet, shihen pjesëmarrës të veshur me uniforma të zeza dhe flamuj fashistë, duke marshuar në mënyrë të organizuar drejt vendit simbolik të ndalimit të Musolinit. Aktiviteti është zhvilluar me praninë e forcave të rendit, por pa asnjë ndërhyrje për ta ndaluar apo për ta ndëshkuar.
Kjo ngjarje përforcon shqetësimet për një rritje të normalizimit të simboleve fashiste në Itali, në një kohë kur retorika e ekstremit të djathtë po zë gjithnjë e më shumë vend në diskursin politik evropian.
