Këngëtari i njohur The Weeknd nuk do të performojë në Festivalin Global Citizen që do të mbahet këtë fundjavë në Central Park, New York. Artisti kanadez, i njohur për hitin “Blinding Lights”, është tërhequr nga eventi për arsye personale, vetëm disa ditë para se të ngjitej në skenë.

Në një deklaratë për mediat, The Weeknd (emri i vërtetë Abel Tesfaye) shprehu keqardhje për anulimin e koncertit:
“Për arsye personale, nuk jam në gjendje të performoj në Global Citizen. Faleminderit fansave për mbështetjen dhe për angazhimin e tyre në këtë kauzë të rëndësishme,” tha ai.

Në vend të tij, në festival do të ngjitet Cardi B, e cila sapo ka publikuar albumin e saj më të ri Am I The Drama?.

Cardi, me stilin e saj energjik, premton një performancë të paharrueshme:
“New York, po vij! Jam shumë e lumtur që do të jem në qytetin tim dhe do të ndaj këngët e reja me ju. Ky festival nuk është si të tjerët, është një moment për të bërë ndryshim.”

Festivali i këtij viti synon të mbledhë fonde për të ndihmuar miliona njerëz në mbarë botën, duke përfshirë qasjen në energji në Afrikë, mbrojtjen e Amazonës dhe edukimin e fëmijëve.

Në skenë do të ngjiten gjithashtu emra si Shakira, Tyla, Ayra Starr dhe Camilo. Ngjarja do të moderohet nga aktori Hugh Jackman.