Tre orë bisedime pa ndonjë përparim domethënës shënuan takimin e parë mes ministrave të Jashtëm të Francës, Gjermanisë dhe Mbretërisë së Bashkuar, të mbajtur në Gjenevë me pjesëmarrjen e përfaqësueses së lartë të BE-së për politikën e jashtme, Kaja Kallas, dhe homologut iranian, Abbas Araghchi. Takimi u zhvillua në një klimë tensioni, vetëm një javë pas sulmeve ajrore të Izraelit ndaj impianteve ushtarake dhe bërthamore në Teheran, që kanë ngritur frikën për një përshkallëzim të madh në rajon.
Qëllimi i bisedimeve ishte bindja e Iranit për të lejuar kontrolle më të rrepta ndërkombëtare mbi programin e tij bërthamor dhe për të shmangur një ndërhyrje ushtarake nga SHBA. Pavarësisht deklaratave të përmbajtura nga palët, ministri iranian përsëriti se nuk do të zhvillohen negociata me Shtetet e Bashkuara, ndërsa shprehu një hapje të kufizuar ndaj dialogut me europianët – por vetëm për çështjet bërthamore dhe rajonale, duke përjashtuar diskutimet për programin raketor.
Zyrtarët evropianë e cilësuan takimin si “serioz” dhe theksuan nevojën për të mbajtur të hapura kanalet e komunikimit. Ndërkohë, diplomacia amerikane ka sinjalizuar gatishmëri për bisedime të drejtpërdrejta me Teheranin, por në sfond mbetet një opsion ushtarak i përgatitur. Bisedimet janë pezulluar për konsultime të brendshme, pa caktuar një datë për rifillimin e tyre.
