Sulme të veçanta që kishin në shënjestër një restorant dhe një shkollë në qytetin e Gazës, vranë dhjetëra persona.
Sulmet izraelite në Gaza kanë vrarë të paktën 61 persona që prej agimit, duke goditur civilë në vende të mbushura me njerëz, ndërsa bllokada më shumë se dy mujore ndaj enklavës së rrethuar dhe të bombarduar ka shkaktuar mungesa të mëdha ushqimore, duke përshpejtuar urinë në popullsinë palestineze.
Një sulm me dron zbulues goditi një zonë pranë restoranteve Thai dhe Palmyra në rrugën al-Wehda, në qytetin e Gazës. Dy raketa u qëlluan në dy vende të ndryshme njëkohësisht, 100 metra larg njëra-tjetrës, një brenda restorantit dhe tjetra në kryqëzimin pranë tij, duke vrarë të paktën 17 persona.
Gazetari i Al Jazeera-s, Hani Mahmoud, raportoi nga qyteti i Gazës se sulmi ajror izraelit goditi një nga vendet e pakta ku palestinezët mund të hanin një vakt.
“Tavolinat dhe karriget janë të shpërndara dhe toka është e mbuluar me gjak si pasojë e gjakderdhjes së rëndë nga sulmi,” tha Mahmoud mes një turme banorësh dhe shitësish ambulantë që shikonin shkatërrimin pas sulmit.
Në vendin e një sulmi tjetër që ndodhi në të njëjtën kohë në një kryqëzim aty pranë, Mahmoud shpjegoi se njerëzit ishin në tokë, “të mbuluar me gjak dhe të copëtuar”.
Më shumë sulme të pamëshirshme izraelite u regjistruan në Gaza të mërkurën, me 13 të vdekur dhe disa të plagosur në një sulm që kishte në shënjestër shkollën al-Karama në lagjen Tuffah të qytetit të Gazës.
Në veri, tre persona u vranë dhe disa të tjerë u plagosën në një sulm në një shtëpi në Jabalia. Tetë persona të tjerë, përfshirë një baba, fëmijët e tij dhe kushërinjtë, u vranë në qytetin Khan Younis në jug, ndër të cilët pesë persona në një shtëpi të goditur.
Tre persona të tjerë, përfshirë një fëmijë, vdiqën pasi një tendë strehimi u sulmua në Deir el-Balah në qendër të Gazës. Një çift bashkëshortësh u vra kur një shtëpi u godit në fshatin Bani Suheila në lindje.
Ndër viktimat ishin katër persona të nxjerrë nga rrënojat pas një sulmi të mëparshëm izraelit në një shkollë që strehonte persona të zhvendosur në kampin e refugjatëve Bureij në qendër të Gazës. Agjencia palestineze e Mbrojtjes Civile tha se më shumë se 30 persona u vranë dhe dhjetëra të tjerë u plagosën atje.
Në mesin e kësaj krize, bllokada izraelite ndaj furnizimeve jetike që nga 2 marsi ka shkaktuar mungesa të mëdha ushqimore, duke përkeqësuar mungesën e miellit dhe artikujve të tjerë esencialë. Grupet humanitare kanë paralajmëruar se furnizimet ushqimore janë drejt mbarimit.
Një nënë me gjashtë fëmijë, e strehuar në një qendër të UNRWA-s, tha se ushqimet kishin mbaruar dhe kishin vetëm bukë. UNRWA kërkoi menjëherë heqjen e rrethimit për të shmangur një katastrofë humanitare.
Sektori shëndetësor në Gaza po përballet me mungesa të mëdha, me 88% të shtretërve në spitale të zënë dhe mungesë të mjeteve mjekësore.
Negociatat për armëpushim Të mërkurën në mëngjes, Egjipti dhe Katari, të cilët ndërmjetësuan marrëveshjen e parë të armëpushimit së bashku me SHBA-në, ripohuan angazhimin për një marrëveshje për të ndalur krizën humanitare.
Ndërkohë që Izraeli paralajmëroi për një ofensivë më të ashpër ushtarake nëse nuk nënshkruhej një marrëveshje armëpushimi, Hamas deklaroi se bisedimet janë të kota për sa kohë që vazhdon “lufta e urisë dhe asgjësimit” në Gaza.
