Një studim i ri nga Norvegjia tregon se shëtitjet e përditshme dhe të qëndrueshme mund të ndihmojnë në parandalimin dhe trajtimin e dhimbjeve kronike të shpinës.
Sipas studimit të botuar në revistën JAMA Network Open, njerëzit që ecin mesatarisht më shumë se 78 minuta në ditë kishin një rrezik dukshëm më të ulët për të zhvilluar dhimbje të shpinës së poshtme, edhe nëse ecja ishte me ritëm të ngadaltë.
Studimi përfshiu të dhënat shëndetësore të mbi 11,000 të rriturve, të cilët për një javë mbanin pajisje për të matur kohën dhe intensitetin e ecjes së tyre. Rezultatet treguan se:
• Ata që ecnin midis 78 dhe 100 minuta në ditë kishin 13% më pak rrezik për të zhvilluar dhimbje kronike shpine.
• Ata që ecnin më shumë se 100 minuta në ditë kishin 23% më pak rrezik.
Interesant është fakti se kohëzgjatja e ecjes ishte më e rëndësishme sesa intensiteti i saj.
“Gjetjet tona sugjerojnë që volumi i përditshëm i ecjes është më i rëndësishëm sesa shpejtësia në uljen e rrezikut të dhimbjes së shpinës,” theksojnë autorët, të udhëhequr nga Rayane Haddadj nga Universiteti Norvegjez i Shkencës dhe Teknologjisë.
Ekspertët thonë se ky zbulim mund të ketë implikime të rëndësishme për politikat e shëndetit publik, duke nxitur lëvizjen e përditshme si një mënyrë të thjeshtë dhe të efektshme për të parandaluar një sërë problemesh shëndetësore.
