Shkencëtarët kanë analizuar mbi 1.2 miliardë postime në rrjetet sociale për të kuptuar se si temperaturat ekstreme ndikojnë tek emocionet e njerëzve. Rezultatet tregojnë se kur termometri ngjitet mbi 35°C, humori ynë kolektiv bie ndjeshëm, veçanërisht në vendet me të ardhura të ulëta. Studimi u publikua në revistën One Earth nga një ekip ndërkombëtar me bazë në MIT dhe institucione të tjera kërkimore.
Postimet e mbledhura nga 157 vende në platformat X (ish-Twitter) dhe Weibo iu nënshtruan një analize të ndjenjës, duke i dhënë secilit prej tyre një vlerë nga 0.0 (shumë negative) deri në 1.0 (shumë pozitive). Shkencëtarët zbuluan se gjatë ditëve shumë të nxehta, ndjenjat negative në postime u rritën deri në 25% në vendet me të ardhura të ulëta dhe me 8% në vendet me të ardhura të larta.
“Mediat sociale na ofrojnë një dritare të paprecedentë në emocionet njerëzore në të gjitha kulturat dhe kontinentet,” tha bashkautori Jianghao Wang nga Akademia Kineze e Shkencave. Ai theksoi se kjo metodë jep njohuri në kohë reale mbi ndikimin e motit në humor, përtej kufijve të anketave tradicionale.
Efektet emocionale të nxehtësisë duken më të forta në shoqëritë më të brishta ekonomikisht. Studiuesit paralajmërojnë se kjo duhet marrë parasysh në parashikimet për ndikimet e ndryshimeve klimatike, duke përfshirë edhe masat e përshtatjes.
Ky nuk është studimi i parë që lidhet me temën. Që nga vitet ’80, kërkime të shumta kanë treguar se temperaturat e larta shoqërohen me shtim të agresivitetit, përfshirë shoferët që i bien më shumë borisë dhe gazetarë që përdorin gjuhë më negative. Për më tepër, disa studime kanë vërtetuar lidhjen midis nxehtësisë ekstreme dhe rritjes së krimeve të dhunshme apo edhe rrezikut për vetëvrasje.
Shkencëtarët besojnë se arsyeja qëndron te ndryshimet biologjike që sjell nxehtësia në trurin tonë – përfshirë nivelet e serotoninës dhe hormonit të testosteronit, të cilat ndikojnë drejtpërdrejt në gjendjen shpirtërore.
Modelet klimatike për shekullin e ardhshëm tregojnë një prirje shqetësuese: deri në vitin 2100, ndjenja globale mund të ulet me rreth 2.3% si pasojë e rritjes së temperaturave, edhe nëse shoqëritë përshtaten gradualisht.
“Moti ndryshon ndjenjën njerëzore në një shkallë globale,” theksoi Nick Obradovich nga MIT, duke shtuar se rezistenca emocionale do të jetë po aq e rëndësishme sa infrastruktura përballë nxehtësisë ekstreme.
Ekspertët paralajmërojnë se pasqyrimi i dhënë nga rrjetet sociale nuk përfshin të gjithë grupet e prekshme, si fëmijët e vegjël dhe të moshuarit, çka nënkupton se kostoja e vërtetë emocionale e valëve të të nxehtit mund të jetë edhe më e lartë nga sa tregojnë të dhënat.
