Rreth 27 mijë maturantë në të gjithë vendin i janë nënshtruar sot provimit të parë të Maturës Shtetërore, atij të Gjuhës së Huaj, duke shënuar fillimin zyrtar të sezonit të provimeve.
Oraret dhe rregullat strikte
Nxënësit duhet të paraqiten në ambientet e shkollës në orën 08:30, ndërsa provimi nis në 10:00 dhe përfundon në 12:30. Të gjithë duhet të kenë me vete dokument identifikimi (kartë ID ose pasaportë) dhe të paktën dy stilolapsa me të njëjtën ngjyrë.
Gjatë zhvillimit të testit ndalohen rreptësisht telefonat celularë dhe orët smart. Gjithashtu, maturantët duhet të jenë me veshje të rregullt, përfshirë uniformën e shkollës, dhe nuk lejohet largimi nga salla përpara përfundimit të orarit zyrtar.
Udhëzimet kryesore gjatë provimit:
- Përdorni vetëm një ngjyrë stilolapsi në të gjithë testin;
- Firmosni testin në marrje dhe dorëzim;
- Kontrolloni për pasaktësi apo paqartësi në pyetjet e testit;
- Respektoni sjelljen dhe disiplinën e kërkuar gjatë testimit.
Kalendari i provimeve të Maturës
Pas Gjuhës së Huaj, provimet do të vazhdojnë sipas këtij kalendari:
- Gjuha Shqipe dhe Letërsia – 10 qershor
- Matematika – 17 qershor
- Provimi me Zgjedhje – 24 qershor
Provimi me zgjedhje përfshin një gamë të gjerë lëndësh si: Kimi, Fizikë, Biologji, Histori, Gjeografi, Qytetari, Psikologji, Filozofi, Sociologji, Ekonomi, Histori Arti, Muzike dhe Baleti.
Testet model janë shpërndarë më herët në shkolla për të ndihmuar maturantët të njihen me formatin dhe strukturën e provimeve, duke reduktuar stresin dhe përmirësuar përgatitjen.
