Një student kinez i doktoraturës në Universitetin College të Londrës, Zhenhao Zou, 28 vjeç, është dënuar me burgim të përjetshëm për përdhunimin e të paktën 10 grave dhe drogimin e shumë të tjerave në Mbretërinë e Bashkuar dhe Kinë. Ai kishte kërkuar që të kastronte kimikisht vullnetarisht për të shmangur dënimin me burg, por gjykatësja Rosina Cottage e hodhi poshtë këtë kërkesë, duke e konsideruar si rrezik të vazhdueshëm për shoqërinë dhe një “grabitqar seksual me maskë të bukur”.

Gjatë hetimeve, policia britanike zbuloi më shumë se 1600 orë video ku Zou kishte regjistruar me kamera të fshehta aktet e tij mizore, duke droguar dhe përdhunuar gra në gjendje të pavetëdijshme. Më shumë se 24 viktima të reja janë paraqitur tashmë, ndërkohë që dyshohet se numri i grave të sulmuara nga Zou shkon në mbi 60, përfshirë viktima në Kinë, Australi, Lindjen e Mesme dhe Evropë. Zou, djali i një zyrtari të lartë të Partisë Komuniste të Kinës, përdorte baret studentore dhe aplikacionet e takimeve për të joshur viktimat në apartamentin e tij luksoz në Londër, ku i drogonte me substanca si butanedioli dhe më pas i përdhunonte. Ai u shpall fajtor për 11 akuza përdhunimi, voyeurizëm, burgosje të paligjshme dhe posedim të materialeve pornografike ekstreme. Prokuroria e përshkroi Zou si “një përdhunues serial dhe një rrezik real për shoqërinë”. Autoritetet kanë bërë thirrje për viktima të tjera të mundshme që të paraqiten.