Çfarëdo që David Beckham të ketë uruar fshehtas teksa festonte ditëlindjen e tij të 50-të me madhështi, me siguri nuk do të kishte dëshiruar të shihte spektaklin e dhimbshëm të djemve të tij në përplasje.
Megjithatë, festimet e shumta në Francë, Londër dhe Cotswolds janë errësuar nga përçarja që ka ndarë djalin e madh të tij, Brooklyn, dhe bashkëshorten e tij Nicola Peltz në një krah, dhe pjesën tjetër të familjes në tjetrin.
Brooklyn, 26 vjeç, dhe aktorja aspirante Nicola, 30 vjeç, kanë munguar në të gjitha etapat e festimeve, duke shtuar spekulimet për shkaqet e kësaj mungese.
Ata nuk ishin të pranishëm në darkën e ditëlindjes së David-it në restorantin Core në Notting Hill të Londrës perëndimore gjatë fundjavës.
Gjithashtu munguan edhe në festimet familjare në Francë të premten, ku David dhe Victoria u shoqëruan nga fëmijët e tyre të tjerë: Romeo, Cruz dhe Harper. Ata munguan edhe në një festë të madhe familjare në rezidencën prej 10 milionë £ në Cotswolds të mërkurën e kaluar, ku ishin të ftuar prindërit dhe vëllezërit e çiftit.
Ajo që e bën më të çuditshme mungesën e Brooklyn është se ai dhe Nicola ndodheshin në Londër gjatë gjithë kohës, pas ardhjes nga shtëpia e tyre në Los Anxhelos.
Mes teorive të shumta konspirative që qarkullojnë, disa kanë vënë në qendër të vëmendjes të dashurën e Romeo-s, DJ dhe sipërmarrësen Kim Turnbull, 25 vjeç.
Kim është mbesa e skulptorit të njohur pas-lufte William Turnbull dhe vajza e muzikantit Alex Turnbull, pjesë e grupit post-punk 23 Skidoo. Ajo më parë ka pasur një lidhje me djalin e Madonnës, Rocco Ritchie, dhe përmes tij ka qenë pjesë e një grupi të ngushtë miqësor ku përfshihej edhe Brooklyn.
Megjithëse dikur kanë qenë të afërt, burime të mirëinformuara mohojnë që Kim dhe Brooklyn të kenë qenë ndonjëherë në një lidhje romantike.
Tani që Kim po cilësohet si “koka turku” për krisjen familjare, kjo është “thellësisht shqetësuese” për prindërit dhe vëllezërit e Brooklyn-it. Vëllai më i vogël, Cruz, 20 vjeç, ka mohuar publikisht këto zëra përmes një komenti në Instagram, duke theksuar: “Brooklyn dhe Kim nuk kanë qenë kurrë në një lidhje.”
Një mik i familjes i tha gazetës Daily Mail: “Kjo s’ka të bëjë fare me Kim. Gjithçka lidhet me Nicolën. David dhe Victoria duan vetëm që djali i tyre të rikthehet – dhe janë gjithmonë të gatshëm ta mirëpresin.”
Sipas miqve të familjes, Nicola ka një zakon për të shkaktuar debate para çdo ngjarjeje familjare dhe më pas e ndalon Brooklyn-in të marrë pjesë. Disa besojnë se janë njerëzit pranë Nicola-s që kanë shpërndarë lajme se shkaku i mosmarrëveshjes është Kim.
Një burim për MailOnline shtoi: “Nicola nuk dëshiron që Brooklyn të jetë pranë familjes së tij fare. Ajo po përdor afërsinë e dikurshme me Kim si justifikim. Ajo e mohon, por që nga martesa, Nicola e ka kontrolluar totalisht. Familja, përfshirë vëllezërit, janë lodhur.”
Sipas thashethemeve, Brooklyn dhe Nicola i kanë kërkuar David-it të festojnë veçmas, larg Kim, sepse kanë “problem” me të. Thuhet gjithashtu se ata nuk morën pjesë as në Met Gala me shpresën se do të ishin në ditëlindjen e David-it – por munguan në të dyja.
David i kishte ftuar djemtë e tij në një udhëtim për peshkim për të festuar ditëlindjen, por Brooklyn e refuzoi ftesën edhe pse ndodhej në Angli atë ditë.
Në postimet në rrjetet sociale, David i ofroi një “degë ulliri” djalit të tij me një foto ku shkruante: “Na mungove @brooklynbeckham.”
Në festën kryesore në Londër morën pjesë yje si Tom Cruise dhe ish-shokët e skuadrës së David-it, ku Romeo mbajti një fjalim në mungesë të vëllait të madh.
Sipas mediave britanike, gjatë orëve të vona, festa u bë aq e zhurmshme sa dy punonjës të bashkisë së Kensington dhe Chelsea shkuan në vendngjarje pas ankesave të fqinjëve. Më pas, muzika u ndal menjëherë.
Një zëdhënës i bashkisë tha për MailOnline: “Këshillat u dhanë për të minimizuar shqetësimet dhe u zbatuan menjëherë.”
