Në qendër të qytetit të Portos në Portugali ndodhet një shtëpi mahnitëse, por që kalon plotësisht e pavërejtur nga mijëra njerëz që ecin përpara saj çdo ditë. Casa Escondido, vetëm 1.5 metra e gjerë, është fshehur mes dy kishave të famshme – Igreja dos Carmelitas dhe Igreja do Carmo – dhe konsiderohet si shtëpia më e ngushtë e qytetit.
Nga jashtë, ndërtesa i ngjan një kishe të vetme të madhe, por në realitet janë tre ndërtesa të ndara. Shtëpia në mes është aq e hollë sa duket si një mur i zakonshëm, me vetëm një derë jeshile të thjeshtë dhe dy dritare, që e bëjnë të “zhduket” për syrin e kalimtarëve.
E ndërtuar në vitin 1968, kjo shtëpi e veçantë përmban një dhomë ndenjeje, dhomë gjumi, studio dhe shkallë spirale, të shpërndara në tre kate – një hapësirë që i ngjan një bote fantazie. Megjithëse hyrja është më pak se një metër e gjerë, ndërtesa hapet në brendësi dhe zbulon ambiente të papritura për nga madhësia.
Sipas gojëdhënave lokale, shtëpia është ndërtuar për të ndarë murgeshat dhe murgjit, pasi njëra kishë u ndërtua në shekullin XVII për murgeshat karmelitase, ndërsa tjetra në shekullin XVIII për murgjit. Një tjetër teori sugjeron se ligji i kohës ndalonte që dy kisha të ndanin të njëjtin mur, duke bërë të domosdoshme ndërtimin e kësaj ndarjeje në formën e një shtëpie.
Brendësia e shtëpisë është karakterizuar nga thjeshtësia – mure të bardha të lyera, dysheme druri dhe një ndjesi qetësie që kujton një qeli murgjish. Ajo është banuar deri në vitet 1980 nga kapelanë, artistë, mjekë dhe kujdestarë të kishës.
Vizitorët që janë kureshtarë për ta parë nga afër këtë perlë arkitekturore të fshehur, mund të blejnë një biletë për vetëm 5 euro, e cila përfshin edhe hyrjen në muze. Dhe ndonëse nga jashtë duket e thjeshtë, një perde e vetme ndan thjeshtësinë e saj nga shkëlqimi i kishave përreth.
