Një raport i ri ndërkombëtar ka zbuluar se Shqipëria është ndër vendet më të prekura në Europë nga vala e të nxehtit ekstrem, për shkak të ndryshimeve klimatike. Sipas të dhënave të publikuara nga “Climate Central”, “World Weather Attribution” dhe Kryqi i Kuq Ndërkombëtar në qershor 2025, vendi ynë ka regjistruar 76 ditë jashtëzakonisht të nxehta gjatë vitit të fundit – dhe 29 prej tyre janë drejtpërdrejt pasojë e ndikimit njerëzor në klimë.

Viti 2024 është zyrtarisht viti më i nxehtë i regjistruar ndonjëherë në planet, me temperatura globale që qëndruan mbi 1.5°C krahasuar me epokën para-industriale. Në Shqipëri, devijimi ishte rreth 1.4°C mbi mesataren historike. Kjo rritje ka shkaktuar valë të nxehti më të gjata, më intensive dhe më të rrezikshme – ngjarje që dikur ishin të rralla, tani po kthehen në normë.

Ekspertët paralajmërojnë se valët e të nxehtit janë ndër fatkeqësitë natyrore më vdekjeprurëse, duke shkaktuar mijëra humbje jete çdo vit, shpesh pa u regjistruar si të tilla. Shqipëria renditet e dyta në Ballkan për numrin e ditëve me të nxehtë ekstrem, menjëherë pas Greqisë.

Për të mbrojtur shëndetin publik, rekomandohet që aktivitetet fizike të zhvillohen gjatë orëve më të freskëta të ditës, të konsumohet sa më shumë ujë dhe të evitohen ekspozimet e gjata në diell. Megjithatë, ekspertët theksojnë se asnjë masë përshtatjeje nuk do të mjaftojë pa ulur urgjentisht përdorimin e karburanteve fosile, që janë burimi kryesor i gazeve serë.

Zgjidhja afatgjatë mbetet veprimi global për reduktimin e emetimeve, ndërkohë që vendet më të rrezikuara – si Shqipëria – duhet të investojnë menjëherë në përforcimin e kapaciteteve përballuese ndaj klimës që po ndryshon me ritme alarmante.