Një zbulim i rrallë ka habitur botën shkencore: kafka e njohur si “Kafka e Petralonës”, e gjetur në një shpellë rreth 35 kilometra në juglindje të Selanikut, nuk i përket as Homo sapiens-it dhe as Neandertalëve.

Kafka e veçantë
Kafka, e cila ka një formë të pazakontë dhe u gjet e ngjitur në murin e shpellës me një stalagmit që i dilte nga koka, është zbuluar fillimisht në vitin 1960 nga një banor vendas, Christos Sariannidis. Pas analizave të reja të realizuara nga shkencëtarë në Kinë, Francë, Greqi dhe Mbretërinë e Bashkuar, u arrit në përfundimin se kafka është të paktën 277,000 vjet e vjetër, ndoshta edhe deri në 295,000 vjet, duke e vendosur në periudhën e Mespleistocenit të vonë.

Jo njeri, jo Neandertal
Studiuesit theksojnë se individi i njohur si “Njeriu i Petralonës” nuk ishte njeri modern, por me shumë gjasë i përkiste Homo heidelbergensis, një specie më primitive, e cila jetonte paralelisht me Neandertalët dhe që konsiderohet paraardhëse e tyre në Europë.

Misteri i pazgjidhur
Kafka, që ndodhet sot në Muzeun Arkeologjik të Selanikut, është pothuajse e plotë, megjithëse i mungon nofulla e poshtme. Ajo i përkiste një mashkulli të ri, bazuar në dhëmbët me konsum të moderuar dhe në madhësinë e fortësinë e kafkës. Zbulimi ka qenë objekt debatesh të mëdha mes shkencëtarëve për më shumë se 60 vjet, duke u atribuar herë Homo erectus-it, herë Neandertalëve ose “Homo sapiens arkaik”.

Studimi i ri
Botuar në Journal of Human Evolution, ky studim i fundit përfaqëson përpjekjen më të saktë deri më tani për të përcaktuar origjinën e këtij individi. Megjithatë, klasifikimi përfundimtar si Homo heidelbergensis pritet të konfirmohet në kërkime të tjera.

Ky zbulim përforcon idenë se evolucioni njerëzor në Europë ishte shumë më kompleks dhe i ndërthurur, duke e bërë “Kafka e Petralonës” një nga fosilet më të rëndësishme për të kuptuar historinë tonë të lashtë.