Departamenti Amerikan i Shtetit ka miratuar një marrëveshje të madhe ushtarake për furnizimin e Ukrainës me deri në 3,350 raketa tokë-ajër RIM-174 Standard ERAM (SM-6), në një paketë që kap vlerën e rreth 825 milionë dollarëve, bëri të ditur të enjten Agjencia e Bashkëpunimit për Sigurinë dhe Mbrojtjen (DSCA).
Sipas legjislacionit amerikan, për marrëveshje të këtij niveli është e nevojshme njoftimi i Kongresit, i cili tashmë është informuar për vendimin.
Financimi i kësaj blerjeje do të mbështetet jo vetëm nga Shtetet e Bashkuara, por edhe nga Danimarka, Holanda dhe Norvegjia, thuhet në deklaratën zyrtare të DSCA.
Njoftimi për këtë shitje vjen vetëm një ditë pas një sulmi masiv rus mbi territorin ukrainas, ku u përdorën qindra raketa dhe dronë. Sulmi i mbrëmjes së së mërkurës konsiderohet si një nga më të rëndët që nga fundi i korrikut, pavarësisht përpjekjeve diplomatike në vijim për t’i dhënë fund luftës.
Në deklaratën e saj, DSCA thekson se “shitja e propozuar do të mbështesë objektivat e politikës së jashtme dhe sigurisë kombëtare të SHBA-së duke forcuar sigurinë e një vendi partner, që është një forcë për stabilitetin politik dhe përparimin ekonomik në Evropë.”
Raketat SM-6 prodhohen nga Zone 5 Technologies dhe CoAspire, kompani amerikane të specializuara në teknologjinë e mbrojtjes ajrore.
