Presidenti serb Aleksandar Vuçiç ka paralajmëruar një reagim të ashpër shtetëror ndaj protestuesve anti-qeveritarë, pas disa ditësh trazira në rrugët e Serbisë që kanë sfiduar gjithnjë e më shumë pushtetin e tij autoritar.

Në një deklaratë të drejtpërdrejtë për televizionin kombëtar të dielën, Vuçiç i quajti protestuesit “terroristë të pastër” dhe akuzoi Perëndimin se po përpiqet të destabilizojë Serbinë përmes një “revolucioni me ngjyra” që, sipas tij, synon të sjellë në pushtet autoritete “anarshiste të majta”. Ai nuk ofroi asnjë provë për këto pretendime.

“Nëse nuk ndërmarrim hapa më të ashpër, është çështje ditësh kur ata do të vrasin dikë,” deklaroi Vuçiç, duke shtuar se përgjigja e shtetit do të jepet brenda javës, edhe pse përjashtoi mundësinë e shpalljes së gjendjes së jashtëzakonshme.

Trazirat nisën pas një tragjedie në një stacion treni në veri të vendit, ku 16 persona humbën jetën. Ngjarja nxiti zemërimin e publikut, që fajëson korrupsionin në projektet publike për shembjen fatale të strukturës. Protestat, të cilat kishin nisur në mënyrë paqësore më shumë se nëntë muaj më parë, kanë marrë përmasa të reja këtë javë.

Të shtunën, protestues të zemëruar dogjën zyrat e partisë në pushtet të Vuçiçit (SNS) në një qytet në perëndim të vendit, ndërsa pati përplasje të dhunshme edhe në Beograd dhe Novi Sad, ku policia përdori gaz lotsjellës dhe dhunë për të shpërndarë turmat. Protestuesit kundërpërgjigjën me granata shokuese, flakadanë dhe shishe.

Pavarësisht paralajmërimeve, mijëra qytetarë dolën sërish në rrugë të dielën në mbrëmje, duke sfiduar drejtpërdrejt Vuçiçin dhe duke kërkuar lirimin e të ndaluarve gjatë protestave. Ata brohoritën “Arrestoni Vuçiçin”, ndërsa raportimet zyrtare tregojnë se të paktën 38 persona janë arrestuar dhe dhjetëra janë plagosur gjatë përplasjeve të ditëve të fundit.

Presidenti serb ka qenë i akuzuar prej kohësh për shtypjen e lirive demokratike dhe lejimin e korrupsionit të thellë, ndërsa ka ruajtur marrëdhënie të ngushta me Rusinë dhe Kinën, pavarësisht se Serbia është zyrtarisht në proces të anëtarësimit në Bashkimin Evropian. Të dielën, Vuçiç falënderoi publikisht Rusinë për mbështetjen ndaj qeverisë së tij.

“Shteti serb do të tregojë vendosmërinë e tij,” deklaroi Vuçiç. “Do të përdorim çdo mjet për të rikthyer rendin dhe qetësinë në vend.”

Ndërkohë, tensionet në vend mbeten të larta, ndërsa komuniteti ndërkombëtar ndjek nga afër zhvillimet në një nga vendet kyçe të Ballkanit.