Me urdhër të Prokurorisë së Tiranës dhe vendim të Gjykatës, Policia dhe Agjencia për Hetimin dhe Pastrimin e Parave kanë sekuestruar pesë pasuri me vlerë rreth 875 mijë euro në pronësi të një 32-vjeçari, i dënuar për tentativë vrasjeje, trafik droge dhe pjesëmarrje në grup kriminal.
Operacioni i koduar “Asset Lock” u zhvillua nga Seksioni për Hetimin e Pastrimit të Parave në bashkëpunim me Agjencinë e Administrimit të Pasurive të Sekuestruara. I riu, i identifikuar si P. P., po vuan aktualisht dënimin për disa vepra të rënda penale, ndërsa pasuritë e sekuestruara rezultojnë të regjistruara në emrin e tij dhe të familjarëve të afërt.
Lista e pasurive të sekuestruara përfshin:
- 2 garazhe
- 1 apartament
- 1 sipërfaqe truall
- 1 subjekt tregtar
Policia njoftoi se hetimet vijojnë për identifikimin e pasurive të tjera që dyshohet të jenë krijuar përmes veprimtarisë kriminale të të dënuarit. Materialet i janë referuar Prokurorisë së Tiranës për veprime të mëtejshme ligjore.
