Rusia ka refuzuar kërkesën e Ukrainës për të zgjatur armëpushimin 30-orësh të shpallur për Pashkët, duke sinjalizuar se nuk ka vullnet për ndaljen e përkohshme të luftimeve. Kremlini konfirmoi se nuk do të miratojë një armëpushim 30-ditor, siç propozoi presidenti ukrainas Volodymyr Zelenski.
Zëdhënësi i Kremlinit, Dmitry Peskov, deklaroi për agjencinë shtetërore TASS se presidenti Vladimir Putin nuk ka dhënë urdhër për ndonjë zgjatje të periudhës së qetësisë. Në reagim, Zelenski tha se nëse Moska refuzon një ndalim të sulmeve me raketa dhe dronë mbi infrastrukturën civile, atëherë kjo është dëshmi se “Rusia dëshiron të vazhdojë shkatërrimin e jetëve njerëzore dhe të zgjasë luftën.”
Sulme mes armëpushimit dhe mosbesim të ndërsjellë
Megjithë armëpushimin simbolik për festën e Pashkëve, të dyja palët u akuzuan reciprokisht për shkelje të marrëveshjes. Kievi dhe Moska raportuan për sulme të vazhdueshme të dielën, me intensifikim të veçantë në rajonin e Donetskut.
“Ne e dimë mirë se si manipulon Moska dhe jemi të përgatitur për çdo skenar,” deklaroi Zelenski, duke shtuar se çdo goditjeje ruse do t’i jepet përgjigje. Nga ana tjetër, Ministria Ruse e Mbrojtjes njoftoi se ushtria ukrainase kreu dhjetëra sulme me dron gjatë natës, duke shkaktuar viktima dhe dëmtime në zona civile.
Asnjë nga këto pretendime nuk mund të verifikohet në mënyrë të pavarur, ndërsa festat e Pashkëve, që duhej të sillnin qetësi, u shndërruan në një tjetër kapitull të konfliktit brutal.
