Një ngjarje e rrallë dhe tragjike ka ndodhur në Karolinën e Jugut, SHBA, ku një djalë 12-vjeçar, Jaysen Carr, ndërroi jetë më 18 korrik 2025 pas infektimit me Naegleria fowleri gjatë notit në liqenin Lake Murray.

Ky organizëm mikroskopik, një amebë e zakonshme në ujërat e ngrohta të ëmbla, hyn në trup përmes hundës dhe udhëton drejt trurit, duke shkaktuar meningoencefalit amebik primar (PAM) një infeksion i rrallë por pothuajse gjithmonë fatal.

Simptomat zakonisht shfaqen 1–9 ditë pas ekspozimit, duke filluar me temperaturë, dhimbje koke dhe nauze. Brenda pak ditësh, gjendja përkeqësohet duke çuar në kriza epileptike, konfuzion, koma dhe shpesh në vdekje.

Që nga viti 1962 në SHBA janë raportuar vetëm 167 raste të PAM, dhe vetëm 4 pacientë kanë mbijetuar. Ky është rasti i parë i konfirmuar në Karolinën e Jugut që nga viti 2016.

Autoritetet shëndetësore paralajmërojnë qytetarët të shmangin futjen e ujit në hundë gjatë notit në ujëra të ngrohta të ëmbla, si dhe të mos përdorin ujë të çezmës të pa sterilizuar për shpëlarje të hundës. Për përdorime të tilla rekomandohet ujë i zier ose i distiluar.

Naegleria fowleri nuk përhapet nga personi te personi dhe nuk shkakton infeksion përmes gëlltitjes së ujit. Rreziku ekziston vetëm kur uji hyn nëpërmjet hundës dhe arrin në tru.