Elon Musk planifikon të nisë në muajin e ardhshëm një grup robotaksish Tesla në Austin të Teksasit, ku deri në 20 automjete elektrike Model Y me vozitje autonome do të transportojnë pasagjerë nëpër rrugët e qytetit. Ai po vë bast të ardhmen e Tesla-s tek ky projekt, ndërsa të ardhurat nga shitjet e makinave elektrike të kompanisë po bien për shkak të rivalëve kinezë në rritje të shpejtë dhe reagimeve politike negative ndaj pozicioneve të Musk-ut dhe rolit të tij si një nga shkurtuesit më të mëdhenj të vendeve të punës gjatë administratës Trump.
Por ka një problem të madh: Tesla nuk ka dëshmuar se robotaksitë e saj janë të sigurta për të filluar shërbimin. Me një histori fatale të softuerëve Autopilot dhe Full Self-Driving (FSD), të cilët janë emra mashtrues, mungesën e të dhënave të detajuara për sigurinë dhe teknologjinë, dhe mbështetjen e Musk-ut në kamera të lira në vend të sensorëve më të avancuar për të naviguar në mjedise komplekse urbane, nisja e këtij projekti në Austin mund të përfundojë në një dështim total.
Kritiku i gjatë i Musk për sistemet autonome, Dan O’Dowd, i cili ka investuar para për reklama në Super Bowl për të nxjerrë në pah mangësitë e Autopilot dhe FSD, tha për Forbes: “Do të dështojë me siguri.” Ai ka testuar versionin aktual të FSD, i cili përdoret në robotaksitë në Austin dhe theksoi se në vetëm 80 minuta vozitje në Santa Barbara kanë ndodhur shtatë gabime serioze që mund të kishin shkaktuar aksidente.
Pavarësisht se nuk ka fituar asnjë të ardhur nga robotaksitë, Musk ka shpallur fitoren. Në prezantimin e rezultateve të Tesla-s më 22 prill, ai tha se askush nuk mund të konkurronte me Tesla-n aktualisht, por ekspertët e konsiderojnë këtë si një vlerësim të parakohshëm.
Demonstrimi i vetëm publik i robotaksive të Tesla-s ishte një vozitje e organizuar në Warner Brothers Studio në Los Angeles, ku automjetet u drejtuan në një qytet artificial pa këmbësorë, me teknikë Tesla që mbikqyrte nga afër. Kjo eksperiencë u quajt nga studiuesi i sigurisë Noah Goodall më shumë si një atraksion sesa një test real në mjedis urban.
Për dekadën e fundit, softueri FSD ka qenë i lidhur me shumë aksidente fatale ku shoferët kanë besuar sistemin për vozitje autonome dhe kanë përfunduar në përplasje. Autoritetet amerikane të sigurisë rrugore (NHTSA) kanë nisur disa hetime mbi sigurinë e Autopilot dhe FSD, veçanërisht pas 13 vdekjeve të lidhura me këto sisteme.
Tesla nuk ka publikuar ende detaje për zonat ku do të funksionojë robotaksi në Austin apo mënyrën e operimit të tyre, dhe bashkëpunimi me autoritetet lokale mbetet i kufizuar dhe pa transparencë.
Në krahasim, konkurrenti kryesor Waymo, pjesë e Alphabet, ka investuar miliarda dollarë dhe ka testuar robotaksitë në rrugë publike për mbi 16 vjet, duke siguruar raporte të detajuara dhe të verifikuara për performancën e tyre.
Një nga sfidat kryesore të Tesla-s është mbështetja e sistemit të tyre në tetë kamera me rezolucion të ulët, të cilat nuk performojnë mirë në kushte me dritë të ulët apo reflektime të forta të diellit, duke shkaktuar ndërprerje të funksionimit.
Përkundër kritikave, Musk pretendon se teknologjia e Tesla-s është më ekonomike dhe e përballueshme sesa ajo e Waymo-s, duke theksuar se një Model Y kushton vetëm një pjesë të vogël të çmimit të makinave robotaksi të Waymo-s.
Musk planifikon të shtrijë këtë shërbim më tej në tregjet amerikane, Kinë dhe Evropë, por kjo do të varet nga miratimet rregullatore.
Megjithatë, përvoja e deritanishme e Musk tregon dështime të përsëritura në realizimin e premtimeve të mëdha për automjetet autonome dhe robotaksitë, duke lënë skeptikë ekspertët dhe investitorët.
Në fund, kritiku Dan O’Dowd përmbledh: “Gjithçka që thotë është gënjeshtër.”
