Dikur tepër i pasur, Rezart Taçi është shpallur fajtor për mashtrim profesional, falsifikim dokumentesh dhe abuzim me besimin, duke dëmtuar veçanërisht interesat e multinacionales SGS, e cila sapo ka lënë kantonin e Gjenevës për në Zoug.
Një i pandehur jo i zakonshëm u dënua të martën në Gjenevë nga Gjykata Korreksionale. Në moshën 54-vjeçare, Rezart Taçi akuzohej për një sërë mashtrimesh financiare përmes aktiviteteve të tij në industrinë e naftës të zhvilluara në Shqipëri, me lidhje të rëndësishme në Zvicër.
Mashtrimi profesional përmes një sistemi “veçanërisht dinak”, sipas aktakuzës, falsifikimi i dokumenteve dhe abuzimi me besimin përbëjnë bazën e gjerë të shkeljeve që i atribuohen atij, në dëm të SGS, gjigantit botëror të certifikimit që sapo ka lënë Gjenevën për Zoug.
Rezart Taçi, një nga figurat më të njohura të biznesit shqiptar në vitet 2000, i mbiquajtur “mbreti i naftës”, ka kaluar nga lavdia dhe pasuria e shfrenuar tek akuzat penale dhe arratia.Në Shqipëri, u bë i famshëm si pronar i kompanisë ARMO dhe si biznesmeni që solli miliarda euro investime të pretenduara në industrinë e naftës. Ai bleu asete strategjike të shtetit, ndërtoi një perandori që përfshinte edhe media të rëndësishme dhe u shfaq shpesh si figurë publike pranë politikanëve kryesorë të kohës. Megjithatë, aktiviteti i tij u shoqërua me akuza për kontrata të dyshimta, borxhe kolosale dhe hetime për evazion fiskal, duke e kthyer shpejt nga simbol i suksesit në një nga biznesmenët më të kontestuar në vend.
