Koreja e Veriut ka ndaluar përkohësisht pranimin e turistëve të huaj në resortin e ri bregdetar “Wonsan Kalma”, vetëm pak ditë pas hapjes së tij më 1 korrik, duke habitur vëzhguesit ndërkombëtarë. Zona turistike, promovuar si një projekt ambicioz i Kim Jong Un për zhvillimin e turizmit, u inaugurua me pjesëmarrjen e zyrtarëve të lartë rusë dhe pritej të priste vizitorë nga jashtë, sidomos nga Rusia.

Megjithatë, faqja zyrtare e turizmit të Koresë së Veriut ka publikuar një njoftim që ndalon vizitat e të huajve, pa sqaruar arsyet. Kjo ndodh në një kohë kur Pheniani po forcon lidhjet me Moskën, duke paralajmëruar edhe fluturime direkte Moskë–Phenian. Resorti, me kapacitet për 20 mijë persona dhe infrastrukturë moderne, është kritikuar për shfrytëzim të fuqisë punëtore gjatë ndërtimit. Arsyet e ndalimit të vizitave mbeten të paqarta, duke ngritur dyshime për probleme sigurie, politike apo mungesë gatishmërie operacionale.