Reshjet e dendura dhe të papritura të shiut kanë shkaktuar përmbytje shkatërrimtare në Pakistan, Kashmirin e administruar nga India dhe Nepal, duke lënë të paktën më shumë se 400 viktima dhe dhjetëra të zhdukur, sipas autoriteteve lokale.
Në Pakistanin veriperëndimor, të paktën 321 persona humbën jetën brenda 48 orëve, raportuan autoritetet të shtunën. Zona më e prekur është Buner, në provincën Khyber Pakhtunkhwa, ku më shumë se dhjetë fshatra janë shkatërruar nga përmbytjet e rrufeshme.
Sipas Bilal Faizi, zëdhënës i agjencisë së emergjencës Rescue 122, rrugët e shkatërruara dhe rrëshqitjet e dheut po e bëjnë të pamundur hyrjen e ekipeve të shpëtimit në zonat e goditura. “Deri tani janë nxjerrë mbi 120 trupa vetëm nga kjo zonë. Vetëm pak ditë më parë, kjo ishte një komunitet plot jetë. Tani nuk ka mbetur asgjë veçse grumbuj shkëmbinjsh dhe rrënojash,” tha Faizi për CNN.
Ndërkohë, pesë anëtarë të një ekuipazhi humbën jetën pasi një helikopter i shpëtimit u rrëzua gjatë misioneve në të njëjtën provincë.
Shkatërrim në Kashmirin indian dhe Nepal
Në Kashmirin e administruar nga India, të paktën 60 persona vdiqën dhe mbi 200 rezultojnë të zhdukur në qytetin Chashoti, një destinacion i njohur pelegrinazhi për hinduistët, raportoi Reuters. Po ashtu, të paktën 41 viktima janë konfirmuar në Nepal, ndërsa 121 persona janë plagosur.
“Kur shiu u bë më i dendur, ndjeva sikur kishte ndodhur një tërmet – toka dridhej e gjitha,” rrëfen Farhad Ali, një student nga rajoni Salarzai në Pakistan. “Pamë një lumë balte dhe shkëmbinjsh të mëdhenj që përplasnin gjithçka pranë shtëpisë sonë. Ishte si fundi i botës.”
Përmbytje, rrëshqitje dherash dhe paralajmërime të reja
Stina e musoneve, që nisi me intensitet të jashtëzakonshëm në fillim të qershorit, ka përmbytur lagje të tëra dhe ka reduktuar shtëpi në grumbuj rrënojash. Shërbimi Meteorologjik i Pakistanit paralajmëron për reshje edhe më të forta nga e diela, me rrezik të shtuar për përmbytje të befasishme dhe urbane në provincën Khyber Pakhtunkhwa.
Pamjet në rrjetet sociale tregojnë lumenj balte që rrjedhin me forcë përmes rrugëve, ndërsa autoritetet u bëjnë thirrje qytetarëve të shmangin zonat turistike dhe të mos kalojnë lumenjtë gjatë kësaj periudhe.
Nga ana tjetër, Departamenti Indian i Meteorologjisë tha se reshjet ndodhën për shkak të një “shpërthimi të resë” (cloudburst) – një fenomen ku bien mbi 100 mm shi për vetëm një orë.
Ndikimi i krizës klimatike dhe dëshmitë tronditëse
Ekspertët paralajmërojnë se kriza klimatike e shkaktuar nga njeriu ka përkeqësuar intensitetin dhe shpeshtësinë e përmbytjeve në rajonin e Himalajeve këtë vit.
Pamje dramatike nga Kashmir tregojnë rrugë të përmbytura, ndërtesa të shkatërruara dhe makina të rrëmbyera nga uji. Në një video të shpërndarë gjerësisht, një mur uji, balte dhe rrënojash zbret nga malet si një ortek.
Operacionet e shpëtimit vijojnë me intensitet, me ushtrinë dhe policinë që kërkojnë të mbijetuarit. Disa prej tyre janë transportuar me urgjencë në spitale.
Tragjedi njerëzore dhe anulime zyrtare
Në Kashmirin indian, trupat janë marrë nga balta, ndërsa komunitetet e tëra janë fshirë nga harta. “Pamje shkatërrimi nga të gjitha anët. Pashë tetë trupa të nxjerrë. Ishte e padurueshme,” tha për AP aktivisti social Abdul Majeed Bichoo. Ai shtoi se tre kuaj arritën të shpëtohen mrekullisht.
Më herët këtë muaj, përmbytje të tjera përfshinë shtetin Uttarakhand në Indi, duke lënë të paktën katër të vdekur.
Kryeministri i Pakistanit, Shehbaz Sharif, mblodhi një takim urgjent në Islamabad për të diskutuar masat dhe shpëtimin pas katastrofës.
Ndërkohë, udhëheqësit rajonalë në Jammu dhe Kashmir anuluan disa aktivitete të planifikuara për përvjetorin e Pavarësisë së Indisë, për shkak të fatkeqësisë.
