Detaje të reja tronditëse janë zbardhur mbi ngjarjen e rëndë të ndodhur më 8 korrik në fshatin Zenisht të Matit, ku 22-vjeçari Renis Dobra u rrëmbye, u dhunua barbarisht dhe u hodh i pajetë në një liqen. Autorët e dyshuar të krimit, të cilët dyshohet se kanë vepruar me plan të mirëorganizuar, kishin marrë me qira dy automjete luksoze, një Range Rover dhe një Hyundai, për të mos lënë gjurmë.

Pamje ekskluzive nga kamerat e sigurisë, tashmë në duart e hetuesve, tregojnë momentet e fundit të jetës së Renis Dobrës. Fillimisht, njëra prej makinave, tip Hyundai, shfaqet duke ndjekur automjetin e viktimës në një rrugë të ngushtë pranë banesës së tij. Pasi e kanë bllokuar, autorët e kanë nxjerrë me forcë nga makina dhe më pas e kanë futur në një nga automjetet e tyre. Më vonë, të dy makinat shihen duke u larguar me shpejtësi nga vendi i ngjarjes.

Sipas burimeve të policisë, natën e 8 korrikut, Renis Dobra po kthehej në banesë kur u ndalua nga dy persona të veshur me uniforma policie. Ai është futur me forcë në njërin prej automjeteve, ku më pas është dhunuar rëndë dhe i është hequr jeta në mënyrë çnjerëzore. Trupi i pajetë u hodh më pas në një liqen, së bashku me automjetin e tij.

Policia dhe prokuroria janë ende në fazën e verifikimeve intensive, ndërsa dyshimet kryesore janë se pas kësaj ngjarjeje fshihet një motiv i rëndë kriminal, me elementë hakmarrjeje dhe përfshirje të grupeve të strukturuara. Të gjitha provat e deritanishme tregojnë një akt të mirëmenduar, ku autorët kanë përdorur mjete luksoze të huazuara dhe veshje policore për të krijuar besim dhe për të shmangur dyshimet.

Ngjarja ka tronditur jo vetëm familjen e të ndjerit, por edhe mbarë opinionin publik, ndërsa kërkohet drejtësi e plotë për këtë krim makabër që rikthen në vëmendje sigurinë e qytetarëve dhe përdorimin kriminal të simboleve të shtetit.