Pas pushimeve luksoze në Dhërmi, Edi Rama është kthyer në zyrë dhe nuk ka humbur kohë: qeveria do të tronditet. Shtatori pritet të sjellë një valë ndryshimesh në kabinetin qeveritar dhe tensioni brenda Partisë Socialiste është rritur ndjeshëm. Nuk bëhet fjalë më për thashetheme korridori – ndryshimet janë të sigurta dhe disa emra të njohur janë në ankth për fatin e tyre.

Sipas burimeve brenda mazhorancës, rifreskimi i qeverisë do të prekë figura kyçe të ekzekutivit. Ogerta Manastirliu, Elisa Spiropali dhe Mirela Kumbaro janë mes atyre që përfliten më shumë dhe, sipas të njëjtave burime, janë në pritje të telefonatës që do t’u konfirmojë ose fundin e mandatit, ose zhvendosjen në një post më periferik. Ankthi është real dhe askush nuk ndjehet i sigurt – përveç një emri: Belinda Balluku.

Balluku, më shumë se ministre, shihet si krahu i djathtë i Ramës në vendimmarrje strategjike. Ajo ka marrë rolin de facto të koordinatores së qeverisë dhe, sipas raportimeve, ka qenë më aktive se kurrë në korridoret e Kryeministrisë gjatë gushtit, duke përgatitur terrenin për ndryshimet që do të shpallen në shtator.