Një zonë toke pranë shtëpisë së dikurshme të Christian Brueckner, i dyshuari kryesor për zhdukjen e Madeleine McCann, po kontrollohet nga autoritetet këtë javë, në një operacion të ri hetimor që po zhvillohet në Portugali.

Prej mbrëmjes së djeshme, rrugë të tëra janë mbyllur dhe janë ngritur çadra kërkimi në zonën mes vendpushimit Praia da Luz, ku u zhduk vajza trevjeçare në maj të vitit 2007, dhe një banese aty pranë ku Brueckner kishte jetuar. Ai aktualisht ndodhet në një burg në Gjermani, ku po vuan një dënim prej shtatë vitesh për përdhunim.

Operacioni, i kërkuar nga policia gjermane dhe i koordinuar nga agjencia kriminale federale gjermane (BKA), përfshin më shumë se 30 hetues dhe përdor teknologji të radarëve që depërtojnë në tokë deri në 5 metra thellësi. Sipas një burimi investigativ, ky veprim erdhi pas një informacioni të ri që u dha pas gjyqit të Brueckner vitin e kaluar, mbi vende ku mund të jetë fshehur trupi i Madeleine.

Kërkimet përqendrohen në 21 prona private mes Praia da Luz dhe një shtëpie të marrë me qira që Brueckner kishte përdorur, ku do të inspektohen puse, rrënoja dhe depozita uji. Ndërkohë, Policia Gjyqësore Portugeze ka konfirmuar se kërkesa për operacionin është bërë nga prokuroria e Braunschweig në Gjermani, në kuadër të hetimeve për vrasje ndaj Bruecknerit.

Kjo është hera e parë që bëhet një kontroll i tillë në Portugali pas më shumë se dy vitesh. Në maj 2023, një operacion i ngjashëm pranë digës Arade nuk dha rezultat, ndërsa më parë, në vitin 2014 dhe 2020, kërkimet në zona të tjera të Praia da Luz gjithashtu nuk zbuluan gjurmë të vajzës së zhdukur.

Brueckner mohon çdo përfshirje në rastin McCann, megjithëse autoritetet gjermane e kanë shpallur publikisht si të dyshuarin kryesor. Ai pritet të lirohet nga burgu në shtator, çka po ushtron presion mbi hetuesit që të veprojnë sa më parë. Aktualisht, ai nuk po mbahet më në izolim.

Policia Metropolitane britanike është në dijeni të operacionit, por nuk po merr pjesë në të.