Në Aeroportin Madrid-Barajas, i cili është më i madhi në Spanjë dhe shërben mbi 65 milionë pasagjerë çdo vit, përfshirë shumë britanikë, është krijuar një “qytet i fshehtë” i të pastrehëve që është lejuar të zmadhohet ndjeshëm gjatë 10 viteve të fundit.
Numri i “banorëve të paautorizuar” në aeroport është rritur nga rreth 50 në gati 500 persona. Këta të pastrehë strehohen kryesisht në Terminalin 4, ku kanë marrë çdo hapësirë të mundshme për të fjetur, përfshirë edhe pranë tualeteve, pas ekranëve të informacionit të fluturimeve dhe në tavolina restorantesh.
Pamjet dhe dëshmitë tregojnë për një komunitet me profile të ndryshme, përfshirë persona me probleme financiare, çrregullime mendore, varësi nga droga dhe alkooli. Sipas disa banorëve, përdorimi i drogës, alkoolit dhe incidentet me dhunë janë bërë më të shpeshta, duke krijuar një klimë të pasigurtë në aeroport.
“Ka disa që vjedhin në mesnatë, marrin telefonat apo cigaret e njerëzve që flenë,” rrëfen Fernando, një banor nga Peru, i cili jeton aty prej disa muajsh. Ai shton se nuk janë të gjithë të këqij, por një pakicë e tillë po ndikon negativisht në imazhin e komunitetit.
Situata është bërë shqetësuese edhe për stafin e aeroportit, të cilët konsiderojnë se përballen me rreziqe për sigurinë dhe mirëqenien e tyre. Ata po mendojnë të paraqesin ankesa në Ministrinë e Punës për kushtet dhe rreziqet e dukshme.
Sindikatat kërkojnë një përgjigje urgjente dhe të koordinuar nga autoritetet për të garantuar sigurinë publike dhe kujdesin dinjitoz për të pastrehët, ndërsa turistët janë shprehur të shqetësuar dhe të habitur nga pamjet që kanë parë.
Një punonjës i një organizate jofitimprurëse tha për RTVE se autoritetet kanë synuar ta bëjnë jetën sa më të vështirë për banorët, duke hequr bankat, prizat elektrike dhe duke kufizuar oraret e gjumit, për t’i detyruar ata të largohen pa ofruar zgjidhje alternative.
Kryetarja e rajonit të Madridit, Isabel Diaz Ayuso, paralajmëroi një “jehonë ndërkombëtare” rreth krizës, duke shprehur shqetësimin se vendet dhe linjat ajrore, përfshirë Britaninë, mund të njoftojnë turistët për rreziqet në aeroport.
“Është një situatë çnjerëzore për këta njerëz dhe as Madrid, as Spanja nuk meritojnë këtë imazh,” tha Ayuso, duke kritikuar qeverinë kombëtare për mungesë veprimi.
Autoritetet e Aeroportit Barajas dhe qeveritë lokale po përballen me një lojë fajësimesh, ndërsa situata mbetet e pazgjidhur dhe rrezikon të dëmtojë imazhin turistik të kryeqytetit spanjoll.
