Në një nga lagjet më të ngarkuara me azilkërkues të Britanisë, Hillingdon, janë shfaqur mini “qytete me çadra” nën ura dhe në parqe publike, ndërsa këshilli vendor përballet me mungesë prej 5 milionë paundësh për të mbuluar nevojat emergjente të strehimit.
Duke strehuar rreth 3,500 azilkërkues – kryesisht në hotele pranë aeroportit Heathrow – Hillingdon ka aktualisht përqendrimin më të lartë të azilkërkuesve në vend, çka po sjell një trysni të papërballueshme mbi shërbimet publike dhe taksapaguesit lokalë.
“Kemi kaluar çdo kufi të financimit që na jep qeveria. Paratë mjaftojnë deri në nëntor, pastaj barra i bie plotësisht taksapaguesve të Hillingdon. Është e papranueshme,” – tha këshilltari konservator Steve Tuckwell.
Rritje e pastrehësisë dhe tensione mes banorëve
Pasi disa prej azilkërkuesve janë shpallur të papërshtatshëm për strehim pasi kanë lënë hotelet, Hillingdon ka parë një rritje të ndjeshme të pastrehësisë, me individë që ngrisin çadra në vende publike.
Banorët vendas shfaqin zemërim të përzier me empati – disa e quajnë “skandaloze” që paratë e taksapaguesve po përdoren në këtë mënyrë, ndërsa të tjerë i drejtojnë kritikat ndaj qeverisë qendrore për mungesë veprimi dhe planifikimi.
“Vajza ime është në strehim të përkohshëm prej vitesh dhe s’merr dot një banesë komunale, ndërsa paratë po shkojnë diku tjetër,” – thotë Lisa Stevens, banore e zonës Cowley.
Mungesë kapacitetesh në shërbimet sociale dhe shëndetësore
Punonjës të shëndetësisë paralajmërojnë se shërbimet e kujdesit mendor janë në kolaps nga fluksi i të ardhurve me trauma të mëdha. “Na duhen fonde shtesë dhe shërbime të dedikuara vetëm për azilkërkuesit,” – kërkon Gina Forse, punonjëse e një institucioni mendor në zonë.
Shtimi i presionit nga marrëveshja për Chagos
Përveç azilkërkuesve që mbërrijnë me gomone nga Franca, Hillingdon po përballet edhe me valë të reja migrimi nga Ishujt Chagos, pas marrëveshjes së qeverisë për t’i kthyer ato nën kontrollin e Mauritanisë. Sipas këshillit, vetëm këtë javë mbërritën 129 individë të tjerë, të cilët duhet të strehohen menjëherë nga autoritetet vendore.
Reagimi i qeverisë: “Po kursejmë 4 miliardë paund deri më 2026”
Një zëdhënës i Home Office u shpreh për BBC:
“Po përshpejtojmë procesimin e kërkesave dhe po reduktojmë përdorimin e hoteleve. Jemi të përkushtuar për një shpërndarje të drejtë të barrës mes komunave dhe ofrojmë mbështetje financiare për to.”
Por sipas shifrave nga grupi London Councils, mungesa e fondeve në të gjithë kryeqytetin kap shifrën 500 milionë paund, me Hillingdon që mban peshën më të madhe.
