Një qytetar në Shqipëri ka rënë pre e një mashtrimi kibernetik, duke humbur një shumë prej 100 mijë lekësh të reja (1 milion lekë të vjetra) nga llogaria e tij në Raiffeisen Bank, pasi klikoi një mesazh të rremë që i vinte në emër të bankës. Ngjarja ka ngritur shqetësime të reja mbi sigurinë e informacionit bankar dhe rrezikun që u kanoset klientëve përmes mashtrimeve teknologjike.

Sipas viktimës, ai kishte marrë një SMS ku i kërkohej të përditësonte kartën bankare brenda ditës për të shmangur pezullimin e shërbimeve. Mesazhi përmbante një link mashtrues që çonte në një faqe të rremë, e cila në fakt ishte një virus që u përdor për të marrë të dhënat e tij bankare. Vetëm disa minuta pas klikimit, nga llogaria e tij janë tërhequr dy shuma prej 50 mijë lekësh të reja secila. Qytetari e kuptoi se ishte mashtruar vetëm pasi mori njoftimet zyrtare nga Raiffeisen Bank për transaksionet.

Ky rast vjen si paralajmërim për të gjithë përdoruesit e shërbimeve bankare që të mos hapin linke të dyshimta apo të japin të dhëna personale përmes mesazheve ose emaileve të paautorizuara. Ndërkohë, ende nuk ka një reagim zyrtar nga Raiffeisen Bank mbi këtë rast të veçantë, ndërsa qytetari pritet të ndjekë rrugën ligjore për të kërkuar dëmshpërblim. Autoritetet e sigurisë kibernetike dhe bankat ftohen të rrisin ndërgjegjësimin dhe masat mbrojtëse ndaj këtyre formave të avancuara të mashtrimit.