Një rrënojë e tmerrshme u shkaktua në momentin kur avionët luftarakë shënjestruan ndërtesën rezidenciale Al-Yazji dhe dyqanet tregtare pranë xhamisë Qashqar, në lindje të qytetit të Gazës. Në pak sekonda, gjithçka u shemb. Këto goditje nuk synojnë vetëm struktura betoni, por edhe vetë thelbin e ekzistencës së një qyteti që tashmë përballet çdo orë e çdo minut me luftë, izolim dhe shkatërrim.
Situata në Gaza është bërë gjithnjë e më e rëndë, me bombardime që nuk bëjnë më dallim mes objektivave ushtarake dhe zonave të banuara. Si rrallë ndonjëherë në historinë moderne, jetët njerëzore po trajtohen me një ftohtësi çnjerëzore, sikur rrugët dhe shtëpitë të mos ishin plot me gra, fëmijë dhe të moshuar. Shumë prej tyre nuk kanë më ku të shkojnë, strehat janë kthyer në varre, dhe rrugët në skena dhimbjeje të pashpjegueshme. Në çdo qoshe të qytetit gjenden gjurmë shkatërrimi, njerëz që kërkojnë të mbijetojnë pa ujë, pa energji dhe pa ndihmë mjekësore. Gaza po mbytet në heshtje, ndërsa bota sheh, dhe vuajtja e një populli të tërë po zhvillohet në kohë reale, pa mëshirë e pa ndalesë.
