Ndërsa diplomatët në mbarë botën përpiqen të kuptojnë mënyrën e sjelljes së Donald Trump, Katari duket se ka gjetur mënyrën perfekte për t’i bërë qejfin ish-presidentit amerikan: t’i dhurojë një avion luksoz me përmasa gjigante për të ushqyer egon e tij të pangopur.
Trump e ka shprehur hapur se vuan nga “zilia e avionëve”. “Shihni disa nga vendet arabe dhe avionët që ata parkojnë pranë avionit të Shteteve të Bashkuara—duken si nga një planet tjetër,” tha ai së fundmi. Tani, ai po konsideron seriozisht të pranojë një nga avionët e Katarit si dhuratë – një vend i pasur me energji që prej kohësh kërkon të fitojë simpatinë e Trump-it. “Një gjest shumë i bukur,” e quajti ai.
Ky “gjest” është krejtësisht në përputhje me preferencat e një miliarderi që gjithmonë ka dashur madhështi dhe ekstravagancë, sidomos në ajër. Avioni personal Boeing 757 i Trump-it, i mbuluar me lëkurë italiane, pëlhura franceze dhe stemën e familjes së tij të qëndisur në mbështetëset e kokës, është një reflektim i qartë i egos së tij. “Është një zgjerim i pyetjes ‘kush e ka më të madhin’,” thotë një nga ish-bashkëpunëtorët e tij.
Në vitet 1980, Trump bleu një pjesë të kompanisë Eastern Airlines dhe krijoi Trump Shuttle, një linjë ajrore që nuk pati sukses. Por ai mbajti një nga avionët Boeing 727 dhe e ktheu në një avion personal luksoz. Më vonë, ai kaloi në një Boeing 757, avionin e ish-bashkëthemeluesit të Microsoft, Paul Allen. Mbi 37 milionë dollarë u shpenzuan për arredimin e tij me shumë ar, mermer dhe, sipas projektuesit të brendshëm, edhe një hapësirë speciale në kuzhinë “për Oreo”.
Ndërkohë, Katari kishte tre avionë Boeing 747 të konvertuar për VIP dhe, në vitin 2018, një prej tyre iu dhurua presidentit turk Erdogan. Një tjetër, me dy dhoma gjumi, tre kuzhina, zyrë dhe sallone luksoze, kishte mbetur në hangar në pritje për t’u shitur. Pasi refuzuan oferta prej 200 milionë dollarësh, autoritetet vendosën që t’ia dhurojnë Trump-it – një lëvizje që mund të ketë vlerë më të madhe diplomatike sesa çdo pagesë.
“Vendosën që më mirë ta dhurojmë tek Trump sesa të vazhdojmë të paguajmë për mirëmbajtjen,” tha ndërmjetësi i shitjes Ben Sirimanne. Kështu, në një diplomaci të re të ndërtuar mbi ego dhe avionë, Katari duket se e ka gjetur formulën për të fluturuar drejt zemrës së Trump-it.
