Protestat anti-qeveritare kanë përfshirë qytete të ndryshme të Serbisë për natën e pestë radhazi, duke sjellë tension dhe përplasje të dhunshme me forcat e rendit. Në Beograd, Valjevo dhe Novi Sad janë raportuar skena kaotike, ku policia ka përdorur gaz lotsjellës për të shpërndarë turmat, ndërsa protestuesit kanë reaguar me sende të forta dhe mjete piroteknike.

Pamje nga vendngjarja tregojnë qytetarë të revoltuar që thërrasin kundër autoriteteve, ndërsa rrugët janë përfshirë nga tymi dhe kaosi. Shkaku kryesor i protestave mbetet pakënaqësia ndaj politikave të qeverisë dhe kërkesat për dorëheqje të zyrtarëve të lartë. Ende nuk dihet numri i saktë i të arrestuarve apo të lënduarve, ndërkohë që situata mbetet e tensionuar.