Propozimi i presidentit rus Vladimir Putin për një takim me presidentin ukrainas Volodymyr Zelensky në Moskë është cilësuar si “i papranueshëm” nga qeveria e Ukrainës.

Ministri i Jashtëm ukrainas, Andrii Sybiha, deklaroi se të paktën shtatë vende, përfshirë Austrinë, Vatikanin, Zvicrën dhe tre shtete të Gjirit, janë të gatshme të organizojnë një takim të tillë.

“Këto janë propozime serioze dhe presidenti Zelensky është i gatshëm për një takim të këtij lloji në çdo moment,” shkroi Sybiha në platformën X. Ai shtoi se “Putin vazhdon të sfidojë të gjithë me propozime që në mënyrë të qëllimshme janë të papranueshme.”

Më herët, presidenti rus Vladimir Putin deklaroi se është i gatshëm të takohet me homologun ukrainas, por vetëm nëse një takim i tillë është “mirë i përgatitur” dhe ka përmbajtje të qartë.

“Nuk e kam refuzuar kurrë një takim me Zelenskyn, nëse ai sjell rezultate pozitive,” theksoi Putin, duke shtuar se e ka diskutuar këtë mundësi edhe me ish-presidentin amerikan Donald Trump.

“Donald më pyeti nëse është e mundur të realizohet një takim i tillë dhe tha se është. Unë i thashë: le të vijë në Moskë,” u shpreh lideri rus.

Duke folur për situatën në Ukrainë, Putin u shpreh optimist duke thënë se ka “dritë në fund të tunelit”. Sipas tij, nëse mbizotëron logjika, mund të arrihet një zgjidhje e pranueshme për përfundimin e luftës.

Ai shtoi gjithashtu se administrata amerikane duket se ka dëshirë dhe vullnet për të gjetur një rrugëdalje. Por paralajmëroi se, nëse nuk arrihet marrëveshje, Rusia do të detyrohet të përmbushë objektivat e saj përmes veprimeve ushtarake.