Miliarderi Behgjet Pacolli, i cili ka qenë për pak ditë edhe President i Republikës së Kosovës, dhe menjëherë më pas u shkarkua nga Parlamenti, mendohet pikërisht për shkak të lidhjeve të forta që ai dyshohet se ka me Rusinë, e ka konfirmuar edhe një herë publikisht afërsinë e tij me Kremlinin dhe presidentin Vladimir Putin.

Në një status të publikuar së fundmi në rrjetet sociale, Pacolli shtiret sikur ka hallin e keqtrajtimit, që sipas tij u është bërë disa shtetasve kosovarë, të cilët janë kthyer në kufi mes Moldavisë dhe Ukrainës. Por në të vërtetë, qëllimi i tij është krejt tjetër, të dalë hapur pro Moskës dhe t’i shfaqë Putin-it besnikërinë e tij, më shumë sesa të mbrojë interesat e qytetarëve kosovarë.

Kujtojmë se Pacolli ka qenë personi që mori përsipër restaurimin 30 000 meter katror e Kremlinit dhe ka përfituar një numër të madh tenderash nga qeveritë filo-ruse për bizneset e tij. Për më tepër, ai është i martuar me një grua ruse dhe ka tre fëmijë me të, gjë që e lidh edhe më shumë me Rusinë dhe tregon se ku e ka në të vërtetë “atdhedashurinë”.

Ky status shihet si dëshmi qe, më shumë sesa një figurë politike e Kosovës, është një mbështetës i vazhdueshëm i Moskës dhe i interesave të Putinit.

“Ka dhjetëra shtete që ende nuk e kanë njohur Kosovën, por pothuajse të gjitha u lejojnë qytetarëve tanë hyrjen me pasaportë kosovare. Sot, Ukraina ka kthyer shtetasit e Kosovës në pikën kufitare me Moldavinë – jo vetëm që i ka refuzuar, por i ka ofenduar dhe maltretuar, madje duke i quajtur “terroristë”. Ky nuk është rasti i parë: para disa vitesh, e njëjta Ukrainë veproi në mënyrë skandaloze me ekipin tonë kombëtar të futbollit, të cilët u detyruan të udhëtonin në Gjeorgji për të zhvilluar ndeshjen.

Ne këtu në Kosovë vazhdojmë të tregojmë solidaritet dhe dhimbje për ta – ndërkohë që ata na poshtërojnë. A nuk është koha të rishqyrtojmë qëndrimet tona ndaj atyre që nuk na respektojnë as dinjitetin më minimal?”