Në një shfaqje të rrallë të unitetit, Mbreti Charles III dhe Princi William morën pjesë së bashku në Ceremoninë e Urdhrit të Banjos në Westminster Abbey, të premten në mëngjes, vetëm disa javë pas intervistës shpërthyese të Princit Harry që përshkroi marrëdhëniet e tensionuara brenda familjes mbretërore.

Princi i Uellsit, 42 vjeç, u bashkua me të atin në këtë ngjarje madhore që zhvillohet një herë në katër vjet, duke treguar një unitet simbolik në një moment delikat për monarkinë, pas akuzave publike nga vëllai i tij më i vogël.

Një ceremoni e lashtë mes tensioneve të reja

Të veshur me mantelat e kuq dhe zbukurime ceremonialë të rendit kalorësiak, William dhe Charles mbërritën veçmas në derën kryesore të Abbey-t rreth orës 11:00, ku u pritën nga dekani i Westminster-it, Dr. David Hoyle. Brenda, të dy përshëndetën njëri-tjetrin ngrohtësisht me një prekje të shpatullës dhe një bisedë të shkurtër miqësore.

Ceremonia e këtij viti shënoi për herë të parë që Charles mori pjesë si sovran i rendit, ndërsa William për herë të parë si Mjeshtër i Madh – titull që më parë e mbante vetë Mbreti për më shumë se 40 vjet.

Në Kapelën e Shën Henrit VII, të dekoruar me flamujt e kalorësve të gjallë, mbreti dhe princi morën pjesë në ritin tradicional të betimit dhe instalimit të anëtarëve të rinj të Urdhrit.

Bashkim përballë ndarjes: mesazh simbolik ndaj Harry-t

Pjesëmarrja e përbashkët e babait dhe djalit vjen në kontrast të fortë me komentet e fundit të Princit Harry, i cili në një intervistë për BBC pretendoi se Mbreti Charles mund të kishte zgjidhur lehtësisht mosmarrëveshjen për sigurinë e tij personale, duke nënkuptuar se mbreti kishte kontroll të plotë mbi vendimin që i hoqi atij mbrojtjen policore në Mbretërinë e Bashkuar.

“Ka shumë kontroll në duart e babait tim. Gjithçka mund të ishte zgjidhur prej tij,” – tha Harry, duke shtuar se Charles “nuk dëshiron të flasë me mua për këtë çështje”.

Ai shtoi gjithashtu se shpresonte në një pajtim, duke thënë se “nuk ka më kuptim të vazhdohet me këtë luftë”, por burime nga pallati mbretëror thanë se “familja nuk i beson më Harry-t” dhe nuk sheh më mundësi për biseda private me të.

Sipas “Hello!”, edhe nëse Charles do të kërkonte një afrim, William e ka përjashtuar çdo mundësi për pajtim.

Simbolikë dhe trashëgimi në shërbim të kurorës

Ky shërbim, që kremton 300-vjetorin e Urdhrit të Banjos, përfshin betimet solemne dhe prezantimin simbolik të shpatareve përpara altarit. Gjatë ceremonisë, William dorëzoi shpatën në altar përpara se ta fuste sërish në këllëf – një akt që përçon ide të nderit, mbrojtjes dhe vazhdimësisë në traditat e kurorës.

Ngjarja ndodhi një vit më herët nga zakonisht për të përkuar me përvjetorin historik të themelimit të urdhrit nga George I më 1725, ndërsa pjesëmarrja është e rezervuar vetëm për anëtarët e rendit dhe të ftuarit e tyre.

Ndërkohë, jeta mbretërore vazhdon

Përveç ceremonisë:

• Mbreti Charles dhe Mbretëresha Camilla morën pjesë më 13 maj në një event bamirësie në Kew Gardens për fondacionin Elephant Family, ku Camilla u përlot nga një video për vëllain e saj të ndjerë.
• Princi William ndau tituj nderi në Windsor Castle për sportistë si Keely Hodgkinson dhe komentatorin Martin Brundle, ku zbuloi se vajza e tij Princesha Charlotte është duke u trajnuar për garat 400m dhe pengesa.