Një video e regjistruar nga kamera e derës ka shkaktuar debat të madh në Britani, pasi tregon momentin kur dy oficerë të Policisë së West Midlands shkojnë në një banesë në Coventry për t’i dorëzuar pronarit një fletushkë në lidhje me një protestë të planifikuar kundër emigracionit që do të mbahet të shtunën në Warwickshire.

Njëri prej oficerëve shfaqet i ndrojtur dhe i parehatshëm për detyrën që po kryente, duke e quajtur vizitën “të mjerueshme” dhe një “marrëzi të madhe”. Ai i tha banorit se “është e drejta juaj të protestoni, nuk ka asnjë problem”, por se ishte i detyruar të shpërndante fletushkën si pjesë e angazhimit të policisë për menaxhimin e protestës.

Banori reagoi ashpër, duke refuzuar fletushkën dhe duke i kërkuar oficerit t’i përcillte policisë një mesazh sfidues: “Ne nuk do të heshtim më. Thuaju të më lënë rehat. Me dashuri.” Ai shtoi: “Shumica e heshtur e Britanisë nuk do të qëndrojë më e heshtur.”

Pamjet, të cilat janë parë mbi 215,000 herë në rrjetin social X, kanë ngjallur reagime të shumta, me shumë komentues që e lavdëruan oficerin për sinqeritetin dhe qëndrimin e tij. “I lumtë policit që pranoi se nuk pajtohej me këtë,” shkroi një përdorues, ndërsa një tjetër shtoi: “Ky oficer ka sens të shëndoshë dhe e kupton që gjërat po dalin jashtë kontrollit.”

Policia e West Midlands deklaroi për mediat se është në dijeni të videos dhe po shqyrton rrethanat e ngjarjes, duke folur me oficerin në fjalë. Sipas tyre, vizita ishte pjesë e punës së koordinuar me Policinë e Warwickshire për përgatitjet rreth protestës së planifikuar këtë fundjavë.