Edhe pse është marrë i pandehur nga SPAK për shkelje të barazisë në tendera gjatë kohës që mbante postin e Sekretarit të Përgjithshëm në Ministrinë e Brendshme, deputeti socialist Plarent Ndreca nuk heziton të sulmojë drejtësinë. Ndreca akuzohet për abuzime në tenderin për rikonstruksionin e katër komisariateve të policisë, si dhe për një tender tjetër të dyshimtë për uniformat e Policisë së Shtetit, me një fond limit prej mbi 2.8 miliardë lekësh pa TVSH . Pavarësisht këtyre akuzave, ai ka zgjedhur të kritikojë institucionet e drejtësisë, duke ngritur pikëpyetje mbi qëndrimin e tij ndaj llogaridhënies dhe transparencës.
Në rrjetin e tij social Facebook ai shkruan:
“Të dashur miq,
Prej më shumë se një viti (që nga Maji i vitit 2024 në mbledhjen e Komisionit të Ligjeve) jam përfshirë në një debat institucional me Inspektorin e Lartë të Drejtësisë, për mosveprimin e tij ndaj shkeljeve të rënda kushtetuese nga institucionet e drejtësisë – përfshirë një hetim penal konkret, si sintomë e një problemi sistemik, që ka sot drejtësia në përgjithësi dhe ajo penale në veçanti.Pas një heshtjeje të gjatë dhe pas dy shkresave të mia dërguar edhe gjithë autoriteteve kombëtare dhe ndërkombëtare që merren me drejtësinë, më në fund ka ardhur një përgjigje shkresore nga ILD, cila provon vetëm një fakt: dështimin e këtij institucioni dhe bashkë me të, dështimin e një instrumenti kushtetues për zbatimin e parimit “kontroll dhe balancë” midis pushteteve. Ky dështim e ka vendosur pushtetin gjyqësor në një pozitë të pakontrolluar, të pabalancuar dhe për rrjedhojë të papërgjegjshme, duke cenuar rëndë themelet e shtetit të së drejtës.
Mbyllja e syve para shkeljeve kushtetuese, në dëm të rëndë të të drejtave dhe lirive themelore të njeriut – që qëndrojnë në themel të rendit juridik sipas nenit 15/1 të Kushtetutës së Republikës së Shqipërisë dhe në dëm të shtetit të së drejtës – nuk është thjesht diskreditim institucional i ILD-së, por një rrezik eminent për funksionimin e balancuar të superstrukturës shtetërore.
Sot publikoj replikën time institucionale, në të cilën ritheksoj shqetësimet e mia si deputet i Kuvendit të Republikës së Shqipërisë dhe kufirin që vendos vetë Kushtetuta:
Askush nuk është mbi ligjin. As gjykata, as prokuroria, as inspektori, as pushteti i heshtjes.”
