TIRANË – Një aksident rrugor është regjistruar sot në mesditë në Bulevardin “Dëshmorët e Kombit”, pranë një semafori në zemër të kryeqytetit. Dy automjete janë përplasur me njëra-tjetrën, duke shkaktuar panik të përkohshëm mes kalimtarëve dhe ngarkesë në trafik.

Pas përplasjes, drejtuesit e mjeteve kanë dalë nga makinat dhe kanë hyrë në një debat të ashpër verbal në vendngjarje. Ende nuk dihet nëse ka pasur të lënduar nga aksidenti, ndërsa policia ka mbërritur në vend për të sqaruar rrethanat e ngjarjes dhe për të menaxhuar situatën.

Ngjarja ka ndodhur në një prej zonave më të frekuentuara të Tiranës, ku qarkullimi i automjeteve dhe këmbësorëve është i lartë gjatë gjithë ditës. Autoritetet u bëjnë thirrje drejtuesve të automjeteve të respektojnë rregullat e qarkullimit për të shmangur incidente të tilla.