Spanja po përballet me përmbytje të rënda dhe stuhi të fuqishme, teksa gjysma e 50 provincave të vendit kanë marrë paralajmërime nga agjencia shtetërore meteorologjike AEMET. Ndërkohë që Britania po shijon një valë të re të nxehti, vendet turistike në Spanjë janë tronditur nga reshje të rrëmbyeshme dhe rrjedha uji shkatërruese. Pamjet dramatike në rrjete sociale tregojnë rrugë piktoreske të mbuluara nga ujërat e ndotura që kalojnë me forcë përpara dyqaneve dhe restoranteve.

Në një video tronditëse, makina shihen duke u rrëmbyer nga rrjedha e lumit El Cardener, ndërsa të tjera janë përmbytur plotësisht nga balta dhe mbeturinat. Kjo situatë ndodh ndërkohë që Europa po përjeton një valë ekstreme të të nxehtit të shkaktuar nga fenomeni “kupola e nxehtësisë”, me temperatura që në disa zona kanë arritur deri në 42°C. Vetëm në qytetin Tarazona të Zaragozës ranë mbi 100 mm shi brenda një ore të premten, duke shkaktuar përmbytje masive, dëme të mëdha në prona dhe ndërprerje të transportit publik. Ushtria spanjolle (UME) është vendosur në zonat më të goditura, ndërsa shërbimi meteorologjik katalanas Meteocat ka dhënë alarmin më të lartë të mundshëm për rajonet e Aragonit dhe Katalonjës, për shkak të reshjeve që pritet të arrijnë deri në 50 litra për metër katror.