Një aksident i rëndë rrugor ka ndodhur pasditen e sotme në Qafë Koshovicë, në hyrje të Gjirokastrës, duke shkaktuar plagosjen e tre personave. Ngjarja ka ndodhur pak minuta pas mesditës, kur një automjet luksoz tip “Benz” ka humbur kontrollin, ka dalë nga rruga dhe është përmbysur disa herë.
Sipas burimeve, në automjet udhëtonin katër persona. Tre prej tyre kanë mbetur të plagosur dhe janë transportuar me urgjencë drejt spitalit të Fierit për ndihmë mjekësore. Gjendja më e rëndë raportohet për një 17-vjeçar, ndërsa dy të tjerët kanë marrë dëmtime më të lehta, por ndodhen nën kujdesin e mjekëve.
Policia dhe grupi hetimor kanë mbërritur menjëherë në vendngjarje, ku po kryejnë veprimet hetimore për të zbardhur shkaqet e aksidentit. Dyshohet se shpejtësia e lartë dhe lagështira në asfalt mund të kenë qenë faktorë kryesorë në humbjen e kontrollit të mjetit, por nuk përjashtohen edhe shkaqe të tjera teknike apo njerëzore. Qafë Koshovica njihet si një segment me kthesa të forta dhe rrezikshmëri të lartë, ku prej vitesh janë regjistruar disa aksidente rrugore.
