Një përleshje e dhunshme me thika ka ndodhur mbrëmjen e sotme në lagjen Çair të Shkupit, duke lënë të plagosur rëndë tre persona, mes tyre edhe një fëmijë 14-vjeçar.

Sipas policisë, ngjarja është raportuar rreth orës 19:48 në kryqëzimin mes rrugëve “Cvetan Dimov” dhe “Xhon Kenedi”. Konflikti dyshohet se ka nisur si pasojë e një keqkuptimi mes palëve, por situata ka degraduar shpejt në dhunë fizike me armë të ftohta.

Të përfshirë në përleshje ishin një djalë 14-vjeçar dhe dy persona të tjerë të moshës 18 dhe 64 vjeç, të gjithë banorë të kryeqytetit. Të tre kanë marrë plagë të rënda dhe janë dërguar menjëherë në Spitalin e Përgjithshëm të Qytetit “Shën Naum i Ohrit” dhe në Qendrën Klinike “Nënë Tereza” për trajtim mjekësor.

Autoritetet kanë nisur hetimet për të sqaruar rrethanat e sakta të incidentit dhe për të përcaktuar përgjegjësitë penale të të përfshirëve. Gjendja shëndetësore e të plagosurve nuk është bërë ende e ditur zyrtarisht.