Një vit pas ndarjes nga këngëtarja Xhensila Myrtezaj, Bes Kallaku po përpiqet të rikthejë jetën e tij në normalitet, duke u fokusuar sërish te profesioni që i dha famën: aktrimi. Pas një periudhe ku eksperimentoi mes muzikës, biznesit dhe projekteve të ndryshme, aktori i njohur i humorit duket se ka vendosur t’i rikthehet pasionit të tij të parë.
Divorci me Xhensilën, një ndarje që tronditi jo vetëm jetën personale, por edhe karrierën e tij, solli një distancim të përkohshëm nga angazhimet artistike. Megjithatë, një e mirë doli nga kjo histori: çmimi i performancave të tij live u rrit ndjeshëm, i ndihmuar edhe nga disa këngë që në publik u perceptuan si akuza të koduara ndaj ish-partneres.
Sidoqoftë, muzika nuk rezultoi një terren ku Besi mund të ndërtonte një karrierë të qëndrueshme. Tashmë ai ka nisur përgatitjet për rikthimin në ekran dhe skenë, si aktor humori dhe pjesëmarrës në filma dhe produksione të reja që do të mbajnë firmën e tij. Kinematografia dhe skena, që dikur i dhanë suksesin, duket se do të jenë fokusi i tij kryesor në këtë kapitull të ri.
Në anën tjetër, Xhensila Myrtezaj, për herë të parë pas ndarjes, ka folur hapur për arsyet që e shtynë drejt divorcit. Në një rrëfim të sinqertë, këngëtarja tregoi se marrëdhënia me Besin kishte vite që kalonte në krizë dhe se vendimi për t’u ndarë ishte marrë për hir të qetësisë dhe mirëqenies së fëmijëve.
“Ka disa vite që ishim përpjekur të sistemojmë pakënaqësitë. Por kur mungon bashkëpunimi dhe marrëdhënia bëhet toksike, duhet të kesh forcë për të marrë vendime të vështira. Forcën e gjeta te fëmijët e mi”, u shpreh Xhensila.
Vetë Besi, në emisionin “Ferma VIP”, ku është moderator, konfirmoi ndarjen dhe foli me emocion për jetën e tij pas divorcit. Ai tregoi se vajza, Ajka, jeton me Xhensilën dhe se arrin ta shohë më shpesh sesa djalin e tij. “Është e vështirë, por më e rëndësishmja është që fëmijët të jenë mirë,” tha ai, duke mos fshehur trishtimin që ka shoqëruar këtë periudhë të jetës së tij.
Rikthimi i Bes Kallakut në aktrim pritet me kuriozitet nga publiku, i cili ka qenë gjithmonë një mbështetje e madhe për të në skenë. Sytë janë tashmë nga projektet e tij të reja, që do të shënojnë një fillim të ri pas një kapitulli të vështirë personal.
