Në një vend ku partitë garojnë për votat e qytetarëve, Partia Socialdemokrate (PSD) duket se ka vendosur të modernizojë konceptin e fushatës zgjedhore duke prezantuar “blerjen me listë”. Nga Shkodra në Kukës e deri në Fier, SPAK ka zbuluar një rrjet të sofistikuar të shpërndarjes së “ndihmave” për votuesit, ndërsa lideri i partisë, Tom Doshi, përfiton nga kjo skemë e sofistikuar për të siguruar ndikimin e tij politik.

Kur Dumani, drejtuesi i SPAK vizitoi Prokurorinë e Shkodrës, ndoshta nuk priste që vizita e tij të shndërrohej në një tur zbulimi të metodave për “garantimin e votës”. Menjëherë pas vizitës së tij, disa persona u kapën me para dhe lista zgjedhësish një kombinim që do të ishte perfekt për një lojë “Bingo”, por jo për zgjedhje të ndershme.

Por historia nuk mbaron këtu. Në Kukës, dy persona të tjerë u shpallën në kërkim për të njëjtën skemë, ndërsa së fundmi, babai i kandidates së PSD-së në Fier, Limonera Bozha, përfundoi në pranga. Kjo duket si një përpjekje për të ndihmuar Partinë Socialiste në rast se numrat për shumicën parlamentare do të bëheshin problem.

Në fakt, PSD duket se është projektuar për të qenë “paterica” e sigurt e qeverisë, një aset që Rama mund ta përdorë për të mbushur boshllëqet e tij politike. Sigurisht, Tom Doshi nuk është një altruist. Duke u fuqizuar politikisht, ai siguron jo vetëm vota, por edhe tendera, dhe akses në qeveri për të vendosur militantët e tij në pushtet qendror.
Pra, me një model të sofistikuar “votë për listë” dhe një sistem ku përfitojnë të gjithë përveç qytetarëve, PSD konfirmon edhe një herë statusin e saj si partia e zgjedhur për ata që duan të blejnë ndikim në pushtet. Një skemë që vetëm ata që kanë “shkopin magjik të listave” mund ta realizojnë me sukses.