Meteorologët amerikanë kanë paralajmëruar për përmbytje potencialisht kërcënuese për jetën përgjatë bregut lindor të SHBA-së, si pasojë e uraganit Erin, i cili po forcohet në Oqeanin Atlantik. Aktualisht një stuhi e kategorisë 3, Erin pritet të rritet në përmasa ndërsa lëviz drejt veriut, pa prekur tokën, por duke gjeneruar rryma të rrezikshme dhe dallgë të mëdha në Bahama, Bermuda, bregun lindor të SHBA-së dhe Kanadasë.
Një alarm për stuhi tropikale është dhënë për Ishujt Turks dhe Caicos dhe juglindjen e Bahamave, ndërsa në Outer Banks të Karolinës së Veriut është shpallur gjendje alarmi për ngritje të rrezikshme të nivelit të detit. Në Hatteras dhe Ocracoke është urdhëruar evakuim i detyrueshëm, pasi autoritetet paralajmërojnë se rruga kryesore mund të bëhet e pakalueshme.
Qendra Kombëtare e Uraganeve e SHBA-së parashikon që qendra e stuhisë të kalojë në lindje të Bahamave ditën e martë, ndërsa të mërkurën dhe të enjten do të lëvizë mes Bermudës dhe bregut lindor amerikan. Rrymat tërheqëse vdekjeprurëse pritet të shfaqen përgjatë gjithë bregut të SHBA-së, duke vënë në rrezik notarë dhe sërfistë. Vetëm në plazhin Wrightsville në Karolinën e Veriut, dhjetëra persona janë shpëtuar nga rrymat ditën e hënë.
Sipas ekspertëve, Erin është një stuhi “jashtëzakonisht e madhe” dhe pritet të zgjerohet edhe më tej. Në orën 05:00 të mëngjesit (lokale), ajo kishte erëra të qëndrueshme deri në 185 km/h.
Sipas prezantueses së motit në BBC, Helen Willetts, “Edhe pse nuk pritet të godasë drejtpërdrejt ndonjë zonë bregdetare, stuhia do të sjellë reshje të mëdha shiu, përmbytje të shpejta, erëra të forta dhe rryma detare të rrezikshme.” Ajo shtoi se reshjet në Puerto Riko kanë arritur deri në 82 mm në 24 orë, ndërsa në Anguilla 62.3 mm.
Erin, i cili është uragani i parë i sezonit të Atlantikut për vitin 2025, u fuqizua në mënyrë të papritur në një stuhi të kategorisë 5 ditën e shtunë dhe që prej atëherë ka pasur luhatje në intensitetin e saj.
Në Ishujt Turks dhe Caicos, autoritetet pezulluan shërbimet publike dhe kërkuan nga banorët në zonat më të rrezikuara të jenë gati për evakuim. Ndërkohë, mbi 150,000 persona mbetën pa energji elektrike në Puerto Riko për shkak të dëmeve në rrjetin elektrik, por kompania Luma raportoi se deri të dielën në mbrëmje, 95% e konsumatorëve kishin energjinë e rikthyer.
